Hebreeërs 2

Mensken heur bruier

⁵ God het wereld dij komt - en doar heb we t hier over - nait aan engels onderdoaneg moakt. ⁶ Krekt aansom. Ain het woaraargens getuugd:
"Wat is mensk, dat Ie om hom denken,
t menskenkind, dat ie noar hom omkieken?
⁷ Ie hebben hom mor n körte schòft bie engels achtersteld,
n kroon van stoatsie en eer heb Ie hom opzet.
⁸ Ale dingen heb Ie in zien macht geven
en aan zien vouten deellegd." ⁷
Dat God alles in zien macht geven het, maint, dat ter niks oetzunderd is. Mor dat zain we nou nog nait. ⁹ Mor we zain Jezus wél, dij n körte schòft bie engels achtersteld was vanwege t deurstoan van dood. Hai is deur genoadege God mit eer en stoatsie kroond, omdat Hai dood ondergoan het. ¹⁰ Hai, dij t begun en t èn van alles is, brochde veul kinder tou heerlekhaid. Doarom mos E Laaidsman ook ja wel tou volmoakthaid brengen. Deur t lieden, wel te begriepen.
¹¹ Hai, dij haaileg moakt en zai, dij haaileg moakt worden, hebben ja altmoal ain en dezulmde oorsprong. Doarom duurt Hai ook bèst "bruiers" tegen heur te zeggen. ¹² Hai zegt ja:
"Joen noam zel ik bie mien bruiers mit ere nuimen,
maank gemainte zel ik Joe priezen." ⁸
¹³ Hai zegt ook nog:
"Ik zel mie haildaal aan God overgeven." ⁹
En:
"Hier bin ik mit kinder, dij God mie geven het." ¹⁰
¹⁴ Nou binnen dij kinder mensken van vlaais en bloud. Doarom het E krekt as wie leven wild, om deur zien dood boas over dood, dat is duvel, van troon òf te kriegen. ¹⁵ En zo ale lu vrij te moaken, dij heur haile leven laank as doeknekt gingen - zó baang wazzen ze veur dood. ¹⁶ Mit engels het E ja gain omdenken. Wel mit Oabraham zien noazoaten. ¹⁷ Doarom mos Hai in alles geliek aan zien bruiers worden. Bloots zó kon E ja n baarmhaartege en traauwe hogepriester worden in God zien dainst. Zó kon E zunden van zien volk goudmoaken. ¹⁸ Omdat Hai zulm leden het en verzöcht worden is, kin E dijent helpen, dij der meschain onderdeur goan.