Hebreeërs 13

t Ènd

²⁰ God van vree het ons Heer Jezus oet dood weerom brocht. Deur zien bloud het E n aiweg verbond sloten. Hai is nou grode schaiper van schoapen. ²¹ Mag dij God joe ale gouds geven, dat ie zien wil doun kinnen. En dat E mit óns dut, wat Hai geern wil, deur Jezus Christus. Aan Hom de eer veur aiweg en aaid. Amen.
²² Ik vroag joe, bruiers en zusters, neemt dizze moudgevende woorden ter haarten. k Heb joe mor n kört braifke schreven. ²³ Wait ie al dat ons bruier Timóteüs vrijloaten is? As e n beetje opschut, kin e mit mie goan en joe opzuiken.
²⁴ Groutnis aan aal joen veurgangers en aan altmoal dij bie God heuren. Bruiers en zusters oet Itoalie doun joe de groeten.
²⁵ Genoade mit joe altmoal.