Hebreeërs 13

Leste inzeggens

¹ Blieft van nkander holden as bruiers en zusters. ² Nait vergeten: deur bie joe mout aaltied aanstoan! Zo hebben gounent ja engels onderdak geven. Mor ze haren t nait deur. ³ Denkt om dij vaast zitten, net of wazzen ie t zulm. Denkt om lu dij mishandeld worden. t Zulmde kin joe ja ook overkommen.
⁴ Traauwd wezen mout bie elkenain in ere holden worden. Bèr van dij baaident mout allenneg veur heur blieven. Dij in ontucht leeft en overspul pleegt, krigt mit God zien oordail te doun.
⁵ Ie mouten nait allenneg veur t geld leven: weest tevree mit wat of ie hebben. God zulm het ja zegd: "Ik zel joe nait in steek loaten. Ik goa nooit bie joe vot!" ³⁶ ⁶ Doarom kin we vol vertraauw zeggen:
"De Heer helpt mie, k bin gain spier benaauwd.
Wat zollen mensken mie al aandoun kinnen?" ³⁷
⁷ Blieft denken om joen veurgangers dij joe God zien woord aanlangd hebben. Kiekt hou zai t ter van ofbrocht hebben. Leeft net zo as zai dat deden. ⁸ Jezus Christus is dezulmde, guster en vandoag, joa, veur aiweg en aaid. ⁹ Loat joe nait in toeze brengen deur lu dij joe allerhande vremde dingen leren. t Is ja goud, dat t haart staarkt wordt deur God zien genoade en nait deur regels over t eten. Lu, dij t hierin zöchten, hebben der gain boat bie vonden.
¹⁰ Wie hebben n altoar, doar of lu dij in tempel dainstdoun, nait van eten maggen. ¹¹ Hogepriester brochde t bloud van daaier dij ovverd werden, in t haailegdom. Mor heur kedoavers werden boeten t legerkaamp opbraand. ¹² Doarom het ook Jezus boeten stadspoort leden, dat zien volk deur zien bloud haailegd wer. ¹³ Loat we den tou legerkaamp oetgoan noar Hom tou, en zien schaande mitdroagen. ¹⁴ Wie hebben hier ja gain stad dij bestoan blift, mor wie binnen aan zöcht noar woonstee dij komt. ¹⁵ Loat ons doarom deur Hom aalgedureg n lofovver brengen aan God. Zien noam priezen is mooiste vrucht van ons lippen. ¹⁶ Nooit mag ie vergeten nkander goud te doun en mit nkander te dailen. Dat binnen ja krekt ovvers dij God geern lieden mag.
¹⁷ Lustert noar joen veurgangers en dout wat ze zeggen. Zai holden woak over joe en mouten doar rekenschop van geven. Zörgt ter veur dat ze heur waark mit plezaaier doun kinnen en nait mit poesten en stìnnen. Dat zol ja nait goud veur joe oetpakken.
¹⁸ Beedt veur ons. Wie holden t ter mor bie, dat we n goud gewaiten hebben. Wie perbaaiern toch van ale kanten om ons fersounlek aan te stellen. ¹⁹ Ik vroag joe benoam te beden, dat ik des te eerder bie joe weerom kommen mag.