Hebreeërs 11

Getugen van t geleuf

¹ Nou is t geleuf vaaste grond van dingen doar mensken op hopen, n bewies van dingen dij we nait zain kinnen. ² Om heur geleuf worden de olden mit ere nuimd.
³ Deur ons geleuf begriep we, dat wereld moakt is deur God zien woord en dat t zichtboare oet t onzichtboare ontstoan is.
⁴ Deur zien geleuf het Oabel God n beder ovver brocht as Kaïn. Deur zien geleuf verkloarde God hom rechtveerdeg en het E zien goaven aannomen. Deur zien geleuf blift Oabel spreken, ook nog noadat hai t ter hier tou doan het.
⁵ Deur zien geleuf is Henoch van dizze wereld vothoald en zo is t kommen, dat e dood nait zag. Gainain het hom weervonden: God haar hom ja vothoald. Al veur zien dood wer van hom getuugd dat e leefde zo as God dat geern zigt. ⁶ Zunder geleuf bestaait dat nait. Dij bie God kommen wil, mout leuven dat E bestaait. En dij Hom zöcht, krigt zien loon.
⁷ Deur zien geleuf het Noach aark kloarmoakt om zien volk te redden. Hai haar ja n bosschop van God kregen over wat nog nait te zain was. Deur dat geleuf het e wereld veroordaild en is e aarfgenoam worden van gerechteghaid dij volgt oet t geleuf.
⁸ Deur zien geleuf het Oabraham lusterd dou e roupen wer. Hai is votgoan noar n laand tou dat veur hom en zien noazoaten bestemd was. Hai raaisde òf, zunder dat e wos woar of e belanden zol. ⁹ Deur zien geleuf kon e leven in t laand dat hom touzegd was - n vremd laand veur hom. Hai woonde doar in tìnten, net as Isaak en Joakob. Dij haren zulmde belofte kregen. ¹⁰ Hai keek ja oet noar n stad mit fonnementen, dij God zulm bedocht en baauwd haar. ¹¹ Deur heur geleuf het Soaroa kracht kregen om moeke te worden, al was ze der ook al te old veur. Ze vertraauwde der op, dat Hai dij t verzegd haar, woord holden zol. ¹² Doarom is oet ain man, dij al over joaren hèn was, n noageslacht kommen, net zo veul as steerns aan lucht en net zo ontelboar as zaandkorrels aan t strand.
¹³ In dat geleuf binnen ze altmoal oet tied kommen en hebben ze nait meer beleefd wat of heur touzegd was. Bloots van vèrren hebben ze dat zain en ze hebben zok ter blied om moakt. Ze binnen der veur oetkommen dat ze vremden wazzen op wereld, vremden en omswinders. ¹⁴ Dij zukswat zeggen, loaten dudelk blieken dat ze noar n voaderlaand aan zöcht binnen. ¹⁵ As ze wènst kregen haren noar t laand doar ze vandoan kwammen, haren ze makkelk weerom goan kind. ¹⁶ Mor ze longern noar n beder voaderlaand - t hemelse. Doarom is t God nait te min, dat ze "God" tegen Hom zeggen. Hai het ja n stad veur heur baauwd.
¹⁷ Deur geleuf het Oabraham, dou e oetperbaaierd wer, Isaak ovvern wild. Joa, hai wol alderdeegs zien ainegste zeun (as ovver) opdroagen, al was hom noageslacht verzegd. ¹⁸ Tegen hom was ja zegd worden: "Allenneg Isaaks kinder zellen joen noazoaten nuimd worden." ³⁰ ¹⁹ Hai rekende der op dat God zulm macht het om doden tou leven te wekken. Doarom het e zien zeun ook weerom kregen, zo t rekent.
²⁰ Deur zien geleuf het Isaak aan Joakob en Esau zien zegen geven, ook mit t oog op toukomst.
²¹ Deur zien geleuf het Joakob, dou e op staarven lag, baaide zeuns van Jozef zegend. En, leunend op stok, het e God aanbeden.
²² Deur zien geleuf het Jozef aan t ènd van zien levent sproken over oettocht van Izrelieten oet Egypte en het e zegd, wat of ze mit zien liggoam doun mozzen.
²³ Deur heur geleuf hebben Mozes zien ollu hom, noa zien geboorte drij moand laank bezied stopt. Ze zaggen dat hai n mooi potje was. En ze luiten zok deur keunenk zien gebod nait baang moaken.
²⁴ Deur zien geleuf het Mozes, dou e groot worden was, nait laanger deurgoan wild veur n zeun van Farao's dochter. ²⁵ Hai wol laiver mit God zien volk lieden onder t kwoad, as veur n pooske zien slinger aan zunde hebben. ²⁶ Schaande om Christus was hom meer weerd as ale schatten van Egypte. Hai dochde aan God zien vroak, dij kommen zol.
²⁷ Deur zien geleuf is e oet Egypte goan - baang veur keunenk zien kwoadens was e nait. t Was of e Hom zag, dij je nait zain kinnen. Doarom huil e kop ter veur. ²⁸ Deur zien geleuf het e Poask insteld en der veur zörgd dat deurposten mit bloud bestreken werden: Doodsengel zol nait aan heur oldste zeuns kommen!
²⁹ Deur heur geleuf binnen Izrelieten deur Rode Zee trokken of was t dreug laand. Dou Egyptenoars dat ook perbaaierden, kwammen ze om.
³⁰ Deur t geleuf van Izrelieten binnen muren van Jericho omvalen, dou ze der zeuven doagen om tou trokken wazzen.
³¹ Deur heur geleuf is t hoerewief Rachab nait omkommen mit aal dij aandern, dij nait lustern wollen. Zai haar verkenners ja vrundelk bie heur in hoes opnomen.
³² Mout ik nog deurgoan? k Heb t ja nait meer aan tied om te vertellen over Gideon, Barak, Simson, Jefta, Doavid, Soamuël en perfeten. ³³ Deur heur geleuf hebben ze keunenkrieken der onder kregen. t Recht hebben ze in t èn holden en ze hebben kregen wat God heur verzegd haar. Laiwen hebben ze de bek stopt, ³⁴ glìnne vuren hebben ze oetmoakt en aan dood deur t sweerd binnen ze ontkommen. Ze gruiden oet boven heur swakte, ze werden staark in t gevecht en hebben vremde legers op de vlucht dreven. ³⁵ Vraauwlu kregen heur zeuns weerom, opstoan oet dood. Aandern hebben zok aan dood tou marreln loaten. Ze wollen nait vrijloaten worden, om n opstanden van n beder levent te kriegen. ³⁶ Weer aandern hebben ze oetperbaaierd deur heur oet te sliepen en òf te trovveln, aan ket te leggen en in t gevang te smieten. ³⁷ Mit vlinten binnen ze doodgooid, swoar tamtaaierd, middendeur zoagd en mit t sweerd n kopke klaainer moakt. Ze swonnen rond in schoapevachten en bokkevellen. Alles was heur ofpakt, ze zatten achter heur aan, ze werden toutoakeld. ³⁸ Ze wazzen te goud veur dizze wereld - ze swaalkten om in woestijnen en op baargen, ze leefden in spelonken en aander holen in grond.
³⁹ Aal dizze lu werden mit ere nuimd. Dat haren ze aan heur geleuf te daanken. Toch het gainent van heur kregen wat heur touzegd was. ⁴⁰ God haar ja nog wat beders mit ons in t zin. Hai wil, dat wie mit nkander tou volmoakthaid kommen.