Hebreeërs 10

Vaastholden aan God

¹⁹ Laive bruiers en zusters! Nou goie moud hebben! Deur Jezus zien bloud heb we nou tougang tou t haailegdom. ²⁰ Hai het veur ons n nij en leventeg pad vrijmoakt, deur t tempelgerdien hèn, dat is: deur zien liggoam hèn. ²¹ Wie hebben n grode hogepriester dij over Gods hoes aansteld is. ²² Doarom: loat we der den noar tou goan mit n eerlek haart en ròtsvaast geleuf, mit n haart dat mit zuver wotter hemmeld is. ²³ Wie mouten aan wat we hopen en belieden stief vaastholden, want God dij t ons touzegd het, is te vertraauwen. ²⁴ Loat ons acht geven op nkander en mekoar aanpittjen om laifde te geven en om goie waarken te doun. ²⁵ Wie mouten nait oet ons bieainkomsten votblieven, zo as paardie lu gewoonlek doun. Net aansom! Wie mouten nkander moud inspreken! En dat destemeer nou je vernemen kinnen: Grode Dag komt aal dichter bie!
²⁶ As we woarhaid kennen leerd hebben, en den toch nog willens en waitens zundegen, den helpt gain ovver veur de zunden meer. ²⁷ Nee, den staait ter elkenain nog mor n iezelk oordail te wachten en t glìnne vuur dat tegenstanders (van God) verteren zel. ²⁸ As ter ain wet van Mozes noast zok deellegt, wordt e op verkloaren van twij of drij getugen zunder perdon ter dood brocht. ²⁹ Wat staait hom den te wachten dij God zien Zeun vertrapt het, bloud van t verbond doar e deur haailegd was hail gewoon en niks biezunders vindt, en Gaist dij genoade geft, lastern dut? Wat ducht joe, zel dij gain veul swoarder straf oplopen? ³⁰ Wie waiten ja wèl of zegd het:
"Ik heb t recht straf oet te dailen,
Ik zel der veur blouden loaten."
En ook nog:
"De Heer zel over zien volk rechtspreken." ²⁸
³¹ As ain in handen van God dij leeft, vervaalt: aldervrezelkst!
³² Denk ais weerom aan vrouger, dou t licht wer in joen levent. Wat heb ie t dou slim te verduren had! Mor ie hebben t oetholden. ³³ Sums wer ie zulm te kiek zet en onder doem holden, den weer wazzen t aandern dij zo behandeld werden en haar ie mit héúr te doun. ³⁴ Ie hebben ja leden mit lu dij vaastzet wazzen. Mit blied gezicht heb ie t aanzain hou ze joe alles wat ie haren, ofstolen hebben. Ie wozzen ja, dat ie nog wat beders haren, dat nooit verloren gaait. ³⁵ Geeft joen vertraauw den nait op: t zel ja dik beloond worden. ³⁶ As ie God zien wil doun willen en kriegen willen wat Hai verzegd het, den zel ie verlet hebben om n toai geduld.
³⁷ Want nog n hail klaain zetje
en Hai dij kommen mout, komt ter aan.
t Zel nait laank meer duren.
³⁸ Deur geleuf zel rechtveerdege leven.
Mor as e t overgeft,
den heb Ik mien wil van hom òf. ²⁹
³⁹ Wie willen niks te doun hebben mit mensken dij t opgeven en verloren goan. Nee, wie heuren bie lu dij leuven en doardeur t levent ter ofredden.