Hebreeërs 1

Boven engels stèld

⁴ Hai is krekt zo hoog boven engels stèld as zien noam, dij E mitkregen het, boven heurent oetstekt. ⁵ Tegen wèl van engels het E ooit zegd:
"Mien Zeun bistoe,
van vandoag òf gèl Ik as dien Voader." ¹
⁶ En as Hai vannijs zien oldste Zeun tou wereld inhoalt, zegt E:
"Veur Hom mouten ale engels van God op knijen valen." ²
⁷ Over engels zegt E:
"Hai let zien engels vlaigen as n störm,
en zien knechten fluistern as vuur." ³
⁸ Mor over Zeun:
"Joen troon, o God, bestaait aiweg en aaid,
doar Ie keunenk binnen, is t recht de boas. ⁴
⁹ Gerechteghaid, doar heb Ie van holden,
en ongerechteghaid heb Ie nait lieden wild.
Doarom, o God, het joen God Joe zaalfd
mit eulie doar je blied van worden,
as bie gain aander."
¹⁰ En:
"In t begun, Heer, heb Ie eerde vaastlegd,
hemel is t waark van joen handen. ⁵
¹¹ Dij zellen vergoan, mor Ie blieven bestoan.
Aal wat is zel verslieten, net klaaier.
¹² As n mantel zel Ie heur oprollen,
as klaaier, doar je wat aans veur aantrekken.
Mor Ie blieven, dij Ie binnen,
aan joen joaren komt gain ènd."
¹³ Het E ooit tegen ain van zien engels zegd:
"Goat zitten aan mien rechterhaand,
totdat Ik joen vijanden hènzet heb
as n voutenbankje veur joen vouten." ⁶
¹⁴ Wat binnen engels aans as dainstboare gaisten, dij der op oetstuurd worden om lu te helpen, veur wèl t haail bedould is?