Handelingen 9

Gemainte gruit in vree

³¹ Zo kon der nou in hail Judeoa, Galileoa en Samerioa in vree waarkt worden aan opbaauw van gemainte. Deurdat dij leefde in ontzag veur de Heer en zok aanvuren luit deur Hillege Gaist, kwammen der aal meer mensken bie.
³² Dou Petrus ze aalmoal bielaans ging, kwam e ook bie haailegen ³⁶ dij in Lydda woonden. ³³ Hai trof doar n man aan, dij Enéas haitte. Al aacht joar haar dij op bèr touholden: hai was verlamd. ³⁴ Petrus zee tegen hom: "Enéas, Jezus Christus moakt joe beder. Kom in t èn, en leg zulm joen bèr terecht." En votdoalek kwam e in t èn. ³⁵ Ale inwoners van Lydda en Saron zaggen hom en bekeerden zok tou de Heer.
³⁶ In Joppe woonde n leerling, dij haitte Tabita. Dat kin je vertoalen mit Dorcas en dat betaikent "Gazel". Ze ston altied veur n aander kloar en dee n bult goud. ³⁷ Net in dij doagen wer ze zaik en kwam oet tied. Ze legden heur òf en boarden heur op in n koamer boven. ³⁸ Nou ligt Lydda stoef bie Joppe. Dou leerlingen den ook heurden dat Petrus doar was, stuurden ze twij manlu noar hom tou. Dij zollen vroagen: "Kom votdoalek noar ons tou!" ³⁹ Petrus kwam in t èn en ging mit heur. Dou e doar aankommen was, brochten ze hom noar dij koamer tou. En ale wedevraauwen kwammen bie hom stoan, in troanen, en luiten Petrus zain houveul klaaier Dorcas moakt haar, dou ze nog bie heur touhuil. ⁴⁰ Petrus stuurde ze aalmoal vot. Hai vuil op knijen en beedde. Dou draaide hai zok om noar t liek en zee: "Tabita, kom in t èn!" Zai dee ogen open en dou ze Petrus zag, ging ze in t èn zitten. ⁴¹ Hai gaf heur haand en holp heur in t èn. Dou raip hai de haailegen ³⁷ , ook dij wedevraauwen. "Kiek!", zee e, "hier heb je heur leventeg weer!" ⁴² Dit wer in hail Joppe bekend en veul mensken kwammen tou geleuf in de Heer. ⁴³ Hai bleef nog verschaaident doag in Joppe en was doar bie n leerlooier Simon.