Handelingen 9

Saulus weerom noar Jeruzelem tou

²³ Dou dat n haile toer zo deurging, beroamden Jeuden t plan hom van kaant te moaken. ²⁴ Mor Saulus kwam aan wait, wat of ze veur haren. Nou loerden ze dag en naacht op hom bie poorten van stad om hom van kaant te moaken. ²⁵ Mor snaachts nammen zien leerlingen hom mit. Ze luiten hom in n körf omdeel, over muur van stad hèn.
²⁶ Dou e in Jeruzelem aankommen was, zöchde hai kontakt mit leerlingen doar. Mor ain bie aander ston hom nait, omreden ze konden nait leuven dat e n leerling was. ²⁷ Mor Bárnabas kwam veur hom op, brochde hom bie apostels en vertelde heur, hou of hai onderwegens de Heer zain haar en dat Dij mit hom proat haar en hou of hai in Damascus hail trankiel optreden was in Jezus zien noam. ²⁸ Van dij tied òf ging e in Jeruzelem doagelks mit heur op en deel. Hai treedde trankiel op in de Heer zien noam. ²⁹ Hai pruit en debatteerde mit Hellenisten ³⁵ , mor dij wollen hom ombrengen. ³⁰ Dou bruiers dit aan wait kwammen, brochten ze hom noar Caeseréoa tou. Doarvandoan stuurden ze hom noar Tarsus.