Handelingen 9

Saulus zien bekeren

¹ Saulus ging nog mor aal te keer en bedraaigde de Heer zien leerlingen mit dood. Zo ging e noar hogepriester tou ² en vruig hom, hai zol hom volmachten mitgeven veur sinegoges in Damascus. Mensken van de Weg ³² dij e doar vinden zol, manlu net zo goud as vraauwlu, kon e den oppakken en noar Jeruzelem tou brengen.
³ Hai was onderwegens en al stoef bie Damascus, dou opains n fel licht oet hemel hom van ale kanten omstroalde. ⁴ Hai vuil op grond en heurde n stem tegen hom zeggen: "Saul, Saul, woarom zitst doe achter Mie heer?" ⁵ Hai vruig: "Wèl bin Ie, Heer?" "Ik bin Jezus", zee E, "doarstoe achterheer zitst. ⁶ Kom in t èn en goa tou stad in. Den zel die zegd worden wat ofstoe doun most."
⁷ Manlu, dij bie hom wazzen, stonden stief stil. Ze konden gain woord oetbrengen; ze heurden stem wel, mor zaggen gainain. ⁸ Saulus kroop weer in t èn, mor al haar e ogen open, hai kon niks meer zain. Dou pakten ze hom mor bie haand en brochten hom tou Damascus in. ⁹ Drij doag laank kon e niks zain en at of dronk e nait.
¹⁰ Nou woonde der in Damascus n leerling, dij Ananias haitte. De Heer zee in n fizioun tegen hom: "Ananias!" Hai antwoordde: "Zeg t mor, Heer!" ¹¹ Dou zee de Heer tegen hom: "Kom! Goa noar Rechtestroat en vroag in Judas zien hoes noar ain oet Tarsus. Hai hait Saulus. Hai is net aan t beden. ¹² En hai het net [in n fizioun] zain, hou of ain dij Ananias haitte der in kwam en hom handen oplegde, om te moaken, dat e weer zain kon."
¹³ Hierop zee Ananias: "Heer, ik heb al van ale kanten heurd, houveul kwoad dizze man joen haailegen ³³ in Jeruzelem aandoan het. ¹⁴ Ook hier het e permizzie van hogepriesters om elk dij joen Noam aanropt, op te pakken." ¹⁵ Mor de Heer zee tegen hom: "Goa der op òf, omreden Ik heb dizze man oetzöcht as n stok keukenriw ³⁴ om der mien Noam in bie volken en heur keunenks en bie t volk Izrel te brengen. ¹⁶ Ik zel hom ja zain loaten, houveul of e om mien Noam lieden mout."
¹⁷ Ananias ging op pad. Hai ging doar in hoes en legde hom handen op. "Bruier Saul", zee e, "de Heer het mie stuurd, - Jezus, dij zok aan die zain loaten het, doustoe hierhèn onderwegens wast -, dastoe weer zain kinst en vol wordst van Hillege Gaist." ¹⁸ Votdoalek was t net of ter doppen van zien ogen ofvuilen. Hai kon weer zain, kwam in t èn en luit zok deupen. ¹⁹ Dou at e wat en kwam weer op krachten.
Hai bleef n dag of wat bie leerlingen in Damascus ²⁰ en votdoalek aal brochde hai in sinegoges bosschop van Jezus, dat dij God zien zeun is. ²¹ Ale lu dij t heurden stonden der versteld van. "Mor dat is toch man", zeden ze, "dij in Jeruzelem aalmoal van kaant muik, dij dizze Noam aanroupen deden? Ook hier was e toch kommen om heur op te pakken en noar hogepriesters te brengen?"
²² Paulus wer aalaan wizzer. Hai brochde Jeuden dij in Damascus woonden van heur stok mit zien bewiezen dat Jezus de Messias is.