Handelingen 8

Bliede Bosschop in Samerioa

⁴ Dij zo verspraaid worden wazzen, brochten overaal doar ze kwammen Bliede Bosschop. ⁵ Zodounde kwam Filippus in stad Samerioa te laande en verkundegde heur de Christus. ⁶ Ze wazzen t aalgemain mit Filippus zien woorden ains, dou ze heurden wat of e zee en dou ze taikens zaggen dij of e dee. ⁷ Bie n bult mensken, dij onnure gaisten in zok haren, kwammen dij der haard bèlkend oet; lammen en kreupeln werden beder. ⁸ Doardeur kwam der grode bliedschop in dij stad.
⁹ Vrouger aal haar ain of aander Simon in dij stad teuverderij doan en t volk van Samerioa haildaal versteld stoan loaten. Hai zee van zokzulm dat e n boaskerel was. ¹⁰ Gainain, groot of luddek, was bie hom vandoan te sloagen. Ze zeden: "Dizze man is wat ie nuimen God zien grode kracht." ¹¹ Dat kwam, deurdat ze al zo laank van zien teuverkunsten versteld stoan haren. ¹² Mor dou ze Filippus begunden te leuven, dij t evengelie van God zien Keunenkriek en van de noam van Jezus Christus brochde, luiten zai zok deupen, manlu net zo goud as vraauwlu. ¹³ Simon zulm kwam ook tou geleuf en noa zien deup bleef e aalaan bie Filippus, versteld as e was deur ale taikens en machtege doaden dij e gebeuren zag.
¹⁴ Dou apostels in Jeruzelem vernammen, dat Samerioa God zien woord aannomen haar, stuurden ze Petrus en Johannes noar heur tou. ¹⁵ Dij gingen der hèn en beden veur heur dat ze Hillege Gaist kriegen zollen. ¹⁶ Dij was nog op gainain van heur deelkommen. Ze wazzen bloots deupt in de Heer Jezus zien noam. ¹⁷ Dou legden ze heur handen op, en zai kregen de Hillege Gaist.
¹⁸ Dou Simon zag, dat Gaist mensken geven wer deurdat apostels heur handen oplegden, bood hai heur geld ¹⁹ en zee: "Geeft mie dij macht ook, dat elk dij ik handen opleg, Hillege Gaist krigt." ²⁰ Mor Petrus gaf hom as beschaaid: "Noar de hel, ie mit joen geld! Ie mainen ja dat ie God zien goave mit geld kopen kinnen. ²¹ Hoog of leeg, der is veur joe gain plak in t beheer van dizze schatten ²⁹ , omreden joen holden tegenover God is nait geef. ²² Breekt mit joen slechteghaid. Beedt de Heer en vroagt vergeven veur wat of ie in t zin haren. ²³ Ik zai ja, dat ie haildaal vergiftegd binnen en betoesterd zitten in ondeugd ³⁰ ." ²⁴ Simon zee: "Beedt ie toch de Heer veur mie, dat mie niks overkommen mag van wat of ie zegd hebben."
²⁵ Dou zai zo van de Heer getuugd en zien bosschop brocht haren, gingen ze weerom noar Jeruzelem tou. En in nog hail wat Sameritoanse dörpen verkundegden ze bliede bosschop.