Handelingen 8

Koamerheer oet Ethiopie

²⁶ n Engel van de Heer zee tegen Filippus: "Kom es! Goa op raais noar t zuden, weg op dij van Jeruzelem noar Gaza lopt." t Is doar n verloaten wereld. ²⁷ Hai kwam in t èn en ging aan raais. Loat e doar nou n man trevven oet Ethiopie, n hoge functionoares van de kandake, keunegin van Ethiopie. Hai regelde aal heur geldzoaken. Dij haar noar Jeruzelem tou west om te beden. En nou was e op weeromraais. ²⁸ Hai zat op zien woagen perfeet Jesajoa te lezen. ²⁹ Dou zee Gaist tegen Filippus: "Goa noar dij woagen tou en toal hom ais aan!" ³⁰ Filippus laip ter gaauw hèn en heurde hom perfeet Jesajoa lezen. "Begriep ie wel wat of ie doar lezen?", vruig e hom. ³¹ "Hou zol k", zee man, "as gainain mie wegwies moakt?" Dou nuigde hai Filippus om in te stappen en noast hom zitten te goan. ³² Nou was dit t gedailte oet Schrift dat e leesde:
'As n schoap wer e noar slachtbaank brocht.
As n laam dij gain kik geft as e schoren wordt,
zo dut e gain mond open.
³³ Ainmoal ofzet mos e veur t recht.
Zien noazoaten: wèl zel t ter over hebben?
Hai wordt ja van kaant moakt! ³¹ '
³⁴ Noar aanlaaiden doarvan zee koamerheer tegen Filippus: "Mag k joe ais vroagen: over wèl het perfeet t hier, over zokzulm of over n aander?" ³⁵ Dou kwam Filippus lös. Hai ging oet van t Schriftgedailte dat man lezen haar, en verkundegde hom t grode nijs over Jezus. ³⁶ Onderwegens kwammen ze bie n wotter. "Kiek, hier is wotter", zee koamerheer, "wat is ter tegen, dat ik deupt wor?" [³⁷ "As ie eerlieks leuven, den mag t", zee Filippus. "Joa", zee e, "ik geleuf, dat Jezus Christus God zien zeun is."] ³⁸ Dou luit e woagen stilholden; en baaident, Filippus en koamerheer, gingen in t wotter en hai deupte hom. ³⁹ Dou ze tou t wotter oetkommen wazzen, nam de Heer zien Gaist Filippus inains vot: koamerheer zag hom nait meer. Mor geliekegoud raaisde hai blied wieder. ⁴⁰ Filippus kwam weer veurndag in Azótus. Op deurraais brochde hai Bliede Bosschop aan ale steden. Net zo laank dat e in Caeseréoa kwam.