Handelingen 7

Stéfanus zien dood

⁵⁴ Dou ze dit heurden, werden ze hoagels op hom en ze knaarsden mit tanden. ⁵⁵ Mor hai ston doar, vol van Hillege Gaist. Hai keek stief noar hemel, zag God zien stroalend licht, en doar ston Jezus aan God zien rechterhaand. ⁵⁶ Hai zee: "Kiek es! Ik zai hemel open en k zai Menskenzeun stoan aan God zien rechterhaand." ⁵⁷ Mor zai begunden haard te roupen, deden vingers in oren en stoven as ain man op hom òf. ⁵⁸ Ze sleepten hom tou stad oet en smeten hom mit stainen. Getugen haren heur mantels deellegd bie n jongkerel, dij Saulus haitte. ⁵⁹ Dou ze Stéfanus mit stainen dood smeten, beedde hai nog: "Heer Jezus, ontvang mien gaist." ⁶⁰ Hai vuil op knijen en raip hail haard: "Heer, reken heur dit kwoad nait aan!" Noa dizze woorden haar e t ter tou doan.