Handelingen 7

Stéfanus zien tousproak

¹ "Is dat zo?", vruig hogepriester hom. ² Stéfanus zee: "Manlu, jong en old, lustert! De hoge God is aan ons veurvoader Oabraham verschenen dou e nog in Mesopotoamie was, veur en aleer hai in Haran wonen ging. ³ En God zee tegen hom: 'Goa tou dien laand oet en bie dien femilie vandoan en kom noar t laand tou, dat Ik die aanwiezen zel ¹² .' ⁴ Dou ging e tou t laand van Chaldeeërs oet en ging in Haran wonen. Dou zien voader oet tied kommen was, luit God hom vervoaren noar t laand tou, doar of ie nou wonen. ⁵ Hai gaf hom der nog gain voutbred van as aarfdail. Mor Hai beloofde wel t in aigendom te geven aan hom en zien noazoaten, schoon dat e dou nog gain kinder haar ¹³ . ⁶ God zee der nog bie: 'Dien noazoaten zellen as vremden in aandermans laand wonen. En dij zellen heur sloaf moaken en 400 joar min behandeln.' ⁷ 'Mor' - zee God - 'Ik zel t volk, doar of ze sloaven van wezen zellen, stravven. Den zellen ze doar vandoan trekken en Mie op dit stee vereren ¹⁴ .' ⁸ Hai gaf aan Oabraham t verbond, dat hierin oetkwam dat ze besneden werden. Dou verwekte hai Izak en besnee hom op aachtste dag. Zo dee Izak mit Joakob en Joakob mit de twaalf stamvoaders.
⁹ Oet ofgunst verkochten dij stamvoaders Jozef noar Egypte. Mor God was mit hom. ¹⁰ Hai verlöste hom zo voak as e in kniep zat. Hai zörgde der veur dat e, deurdat e zo kloar was, in gunst kwam bie Farao. Dij gaf hom laaiden over Egypte en zien haile hof. ¹¹ En der kwam hongersnood over hail Egypte en Kanan. t Kneep ter zo slim, dat ons veurvoaders niks meer te eten haren. ¹² Mor dou Joakob heurde, dat ter nog koorn te kriegen was in Egypte, stuurde hai ons veurvoaders doar hèn. Dit was heur eerste raais. ¹³ Bie twijde raais zee Jozef tegen zien bruiers wèl of e was. Zo wer Farao gewoar, woar of Jozef ainlieks heer kwam. ¹⁴ Dou luit Jozef zien voader Joakob overkommen, mit zien haile femilie, vievenseuventeg man. ¹⁵ Zo kwam Joakob noar Egypte tou. Doar is e oet tied kommen; ons veurvoaders net zo. ¹⁶ Ze werden overbrocht noar Sichem en biezet in t graf dat Oabraham in Sichem veur n zeker bedrag kocht haar van Hemor zien zeuns.
¹⁷ Hou dichter of tied van God zien belofte aan Oabraham bie kwam, hou meer of t volk in Egypte aanwos en groder wer. ¹⁸ Net zo laank dat ter in Egypte n keunenk aan macht kwam, dij van Jozef niks òf wos ¹⁵ . ¹⁹ Dij legde t hail filaain aan mit ons volk en behandelde ons veurvoaders min. Ze mozzen heur lutje potjes te vonde leggen, dat heur noageslacht oetstaarven zol. ²⁰ In dij tied wer Mozes geboren. t Was n meroakels mooi kind. Drij moand laank wer e in t olderliek hoes verzörgd. ²¹ Dou hai te vonde legd was, nam Farao zien dochter hom op en luit hom grootbrengen net of t heur aigen zeun was. ²² Mozes kreeg onderricht in aal wat of ter in Egypte te leren was. Hai haar n staarke stem in t kepittel en grode volmachten.
²³ Dou e in zien vattegste was, kreeg e t in t zin ais te kieken hou of zien bruiers, de Izrelieten, der aan tou wazzen. ²⁴ Dou e zag dat ain van heur onrecht aandoan wer, kwam hai veur hom op en muik t liek: hai sluig Egyptenoar dood. ²⁵ Hai dochde dat zien bruiers wel deur kregen, dat God heur deur hom verlözzen wol. Mor dat kregen ze nait. ²⁶ Aanderdoags ston e inains weer veur heur dou ze aan t vechten wazzen. Hai perbaaierde heur bie nkander te kriegen en zee: 'Manlu, ie binnen toch bruiers? Woarom doun ie nkander onrecht aan?' ²⁷ Mor man dij zien kammeroad tamtaaierde, stötte hom vot. 'Wèl het joe as laaider en richter over ons aansteld?', zee e. ²⁸ 'Wil ie mie meschain ook doodsloagen, net zo as guster dij Egyptenoar? ¹⁶ ' ²⁹ Dou Mozes dat heurde, ging e der vandeur. Hai ging as vremde in Midjan wonen. Doar kreeg e twij zeuns.
³⁰ Vatteg joar gingen veurbie. Dou verscheen der n engel aan hom in vlammen van n brandende brommelbos. t Was in woestijn doar baarg Sinaï in ligt. ³¹ Mozes keek vremd op dou e dat zag. Dou e der hèn ging om te zain wat of t was, luit de Heer zien stem heuren: ³² 'Ik bin de God van dien veurvoaders, de God van Oabraham, Izak en Joakob. ¹⁷ ' Mozes trilde der over en sluig handen veur ogen. ³³ Dou zee de Heer tegen hom: 'Trek dien sandoalen oet. Stee doarstoe op staaist is haailege grond ¹⁸ . ³⁴ Ik heb wis wel zain hou of ze mien volk in Egypte mishandeln deden. k Heb wel heurd hou of ze stènnen deden, en bin omdeel kommen om ze te verlözzen. En nou, kom hier, Ik zel die noar Egypte tou sturen. ¹⁹ '
³⁵ Dij Mozes, aigenste van wèl of ze nait waiten wollen dou ze zeden: 'Wèl het joe as laaider en richter aansteld ²⁰ ', dij het God as laaider en verlözzer der op oetstuurd onder beschaarmen van engel, dij hai zain haar in t brandende brommelbos. ³⁶ Dij het heur tou t laand oetlaaid. Doarbie dee e wonders en taikens in Egypte, bie Rode Zee en 40 joar laank in woestijn. ³⁷ Dij Mozes is t, dij aan t volk Izrel zegd het: 'n Perfeet as ik bin, zel God veur joe, oet joen bruiers opstoan loaten. ²¹ ' ³⁸ Dij is t, dij dou t volk in woestijn bie nkander roupen was, aan aine kaant zok verston mit engel dij mit hom pruit op baarg Sinaï, aan aander kaant mit ons veurvoaders. Hai het woorden heurd dij ons levent roaken, om ze aan ons deur te geven.
³⁹ Mor ons veurvoaders hebben nait noar hom lustern wild en hebben hom aan kaant zet. Ze muiken plannen om weerom te keren noar Egypte tou. ⁴⁰ Dat ze zeden tegen Aäron: 'Moak ons goden, dij veur ons aan goan kinnen. Dij Mozes ja, dij ons tou Egypte oetlaaid het, wie waiten nait wat of hom overkommen is. ²² ' ⁴¹ Dou muiken ze n kaalf en brochten ze n ovver aan dij ofgod. Ze vierden feest ter ere van wat of ze mit heur aigen handen moakt haren. ⁴² Dou keerde God zok van heur òf en gaf heur over aan eredainst van moan en steerns, zo as schreven staait in t perfetenbouk:
'Izrel,
heb ie Mie sums slachtovvers en braandovvers brocht,
dij 40 joar in woestijn?
⁴³ Nee toch!
Ie hebben Moloch ²³ zien tent droagen
en joen god Raifa ²⁴ zien steern.
Ofbeeldens dij ie zulm moakt hebben om aan te beden.
Doarom zel Ik joe noar n aander woonstee brengen,
nog wieder vot as Babylon. ²⁵ '
⁴⁴ In woestijn haren ons veurvoaders tent mit akte van t verbond. Engel, dij mit Mozes proat het, haar hom besteld dij zo te moaken as hai hom zain loaten haar. ⁴⁵ Ons veurvoaders nammen dij mit t laand in, dou ze dat onder Jozua op volken veroverden dij God veur ons veurvoaders aan der oet juig. Tent dee dainst aan tied van Doavid tou. ⁴⁶ Mit hom haar God veul op. Doarom vruig e, of hai veur de Heer, veur Joakob zien God, noar n woonstee omzain mog ²⁶ . ⁴⁷ En dou baauwde Salomo n hoes veur Hom. ⁴⁸ Mor de hoogste God woont nait in wat of mensken moakt hebben. Net zo as perfeet zegt:
⁴⁹ 'De Heer zegt:
'Hemel is mien troon,
wereld n voutbaank veur mien vouten.
Wat mag dat den wel veur n hoes wezen,
dij ie veur mie baauwen zellen?
Wat mag dat den wel veur n stee wezen,
doar of Ik mie thoes vuil?
⁵⁰ Dat heb Ik toch aalmoal zulm moakt? ²⁷ ''
⁵¹ Stiefkoppen! Ie sluten joen haart òf en dounen joen oren dicht. Altied keer ie joe tegen Hillege Gaist, net as joen veurolders dat doan hebben! ⁵² Achter welke perfeten hebben joen veurvoaders nait aanzeten? Joa, alderdeegs hebben zai dijent ombrocht dij de Rechtveerdege zien komst aankundegd hebben. En van Hom bin ie nou verroaders en moordenoars worden. ⁵³ Der ston aan weerskanten nog wel n rieg engels bie ²⁸ dou ie wet kregen! En toch heb ie joe der nait aan holden!"