Handelingen 10

Cornelius

¹ Nou woonde der in Caeseréoa n zekere Cornelius. Hai was kaptaain bie t zogenoamde Itoalioanse reziment. ² t Was n vroom man. Hai heurde mit aal zien hoesgenoten bie lu, dij God vreesden ³⁸ . Hai dee t volk n bult goud en beedde geregeld tou God. ³ Op n dag - t was om en bie drij uur smirregs -, zag e in n fizioun dudelk n engel van God tou zien hoes inkommen. Dij zee tegen hom: "Cornelius!" ⁴ Hai keek hom stief aan en wer baang. "Wat is ter, Heer?", zee e. Hai zee tegen hom: "Joen beden en t goud, dat ie doan hebben, binnen God onder ogen kommen en Hai holdt ze hailtied in gedachtens. ⁵ Nou den, stuur n poar manlu noar Joppe tou. Ze mouten n zekere Simon, mit bienoam Petrus, ophoalen. ⁶ Hai holdt tou bie n leerlooier Simon, dij bie zee woont."
⁷ Dou engel dij mit hom sproken haar, votgoan was, raip e twij van zien knechten bie hom en n vrome soldoat, ain van zien staf. ⁸ Hai legde t heur aal oet en stuurde heur noar Joppe tou.
⁹ Aanderdoags, dou zai nog onderwegens wazzen en al dicht bie stad kwammen, ging Petrus om mirregstied noar t platdak om te beden. ¹⁰ Hai kreeg honger en wol wat eten. Dou ze dat kloar muiken, ruik hai boeten zokzulm. ¹¹ Hai zag hemel open en der kwam zukswat as n groot loaken omdeel, dat aan vaaier tippen ommeneden loaten wer. ¹² Doar zatten ale vaaiervouters en kroepdaaier in, dij op grond touholden, en ale vogels oet lucht. ¹³ Der klonk n stem, dij tegen Petrus zee: "Tou Petrus, slacht en eet!" ¹⁴ Mor Petrus zee: "Gain sproake van, Heer! Nog nooit heb ik wat eten dat nait kouster is of nait zuver!" ¹⁵ Nog ais, veur twijde keer, richtte stem zok tou hom: "Wat of God zuverd het, magst doe nait veur onzuver holden." ¹⁶ Dit ging zo aan drij keer tou. Dou wer inains dat ding weer noar hemel optrokken.
¹⁷ Petrus wos nog nait, wat of e van t fizioun dat e zain haar, denken mos, dou ofgezanten van Cornelius noa veul gezuik noar Simon zien hoes, inains veur deur stonden. ¹⁸ Ze raipen: "Volk!", en vruigen of Simon, mit bienoam Petrus, doar touhuil. ¹⁹ Petrus was nog aal aan t prakkezaaiern over dat fizioun. Dou zee Gaist tegen hom: "Doar binnen drij manlu, dij die hebben mouten. ²⁰ Tou, goa omdeel en raais zunder in twijstried te stoan mit heur mit, omreden Ik heb heur stuurd." ²¹ Petrus kwam omdeel en zee tegen dij lu: "Ik bin t, dij ie hebben mouten. Wat is reden van joen komst?" ²² Ze zeden: "Kaptaain Cornelius, n rechtveerdeg man, dij God daint en goud bekend staait bie t haile Jeudse volk, het van n haailege engel bosschop kregen, hai zol joe bie hom thoes nuigen en heuren, wat of ie te zeggen hebben." ²³ Hai luit heur der in kommen en onthoalde heur gastvrij.
Aanderdoags ging e mit heur aan raais. n Poar bruiers oet Joppe gingen mit. ²⁴ Doags ter op kwam e in Caeseréoa aan. Cornelius verwachtte heur al. Hai haar zien femilie en zien beste vrunden bie nkander roupen. ²⁵ Dou Petrus der in kwam, kwam Cornelius hom in muit en ging op knijen om hom aan te beden. ²⁶ Mor Petrus trok hom in t èn en zee: "Goa stoan, man! Ik bin ook ja mor n mensk." ²⁷ Aal proatend ging e mit hom in hoes. Doar von e n hail gezelschop bie nkander. ²⁸ Hai zee tegen heur: "Ie waiten, dat t aan n Jeud verboden is om mit ain van n aander volk om te goan of der bie in hoes te kommen. Mor God het mie dudelk moakt, dat ie gain mensk op wereld onzuver of onnuur nuimen maggen. ²⁹ Doarom bin ik ook zunder tegenhaspeln mitkommen, dou ik hoald wer. Mor nou wil k wel ais waiten, woarom of ie mie roupen loaten hebben." ³⁰ Cornelius zee: "Van nou òf rekend vaaier doag leden was k om drij uur smirregs thoes aan t beden. Dou kwam der inains n man veur mie stoan mit blinkende klaaier aan. ³¹ 'Cornelius', zee e, 'dien gebed is verheurd en ale goud dastoe doan hest is God in t zin kommen. ³² Stuur ain noar Joppe tou en loat Simon, mit bienoam Petrus, kommen. Hai holdt tou bie leerlooier Simon, dij bie zee woont.' ³³ Nou, dou heb k op slag n poar lu noar joe toustuurd. En ie hebben der goud aan doan, dat ie kommen binnen. Wie binnen hier aalmoal onder God zien ogen bie nkander om te heuren, wat of joe aalmoal deur de Heer besteld is."
³⁴ Petrus begunde: "Nou krieg ik goud deur: God kikt gainain noar ogen. ³⁵ Ain dij Hom vreest en dut wat of goud is, van net geliek welk volk, staait Hom aan. ³⁶ Dit is bosschop dij God aan t volk Izrel stuurde, dou E heur t goie nijs brengen luit, dat deur Jezus Christus verholden mit Hom weer in order is: 'Dij is nou Heer over ale mensken.' ³⁷ Ie waiten wat of ter in t haile Jeudse laand, van Galileoa òf, noa deup doar Johannes tou opraip, veurvalen is: ³⁸ t optreden van Jezus oet Nazeret. Hou of God Hom zaalfd het mit Hillege Gaist en mit kracht. Overaal kwam E om mensken te helpen en ale lu beder te moaken dij duvel der onder huil. Dat kon E, omreden God was mit Hom. ³⁹ En wie binnen getuge van aal wat of Hai, in t laand van Jeuden en in Jeruzelem, doan het. Ze hebben Hom dood moakt deur Hom aan t kruus te sloagen. ⁴⁰ Mor God het Hom op daarde dag opwekt en heur onder ogen kommen loaten. ⁴¹ Wel nait van t haile volk, mor van getugen, dij van teveuren deur God aanwezen wazzen: van ons, dij mit Hom eten en dronken hebben, dou E oet dood opstoan was. ⁴² Wie zollen van Hom t volk waiten loaten en der van getugen: Hai is t, dij deur God aansteld is as richter over leventegen en doden. ⁴³ Van Hom getuugden ale perfeten, dat elk dij op Hom vertraauwt, deur zien noam vergeven van zunden krigt."
⁴⁴ Petrus was nog aan t woord, dou Hillege Gaist deelkwam op aalmoal, dij noar zien tousproak lustern deden. ⁴⁵ Ale geleuvegen van Jeudse ofkomst dij mit Petrus mitkommen wazzen, stonden der versteld van dat ook over haaidens goave van Hillege Gaist oetgoten was. ⁴⁶ Ze heurden heur ja spreken in toalen en hoog van God opgeven. ⁴⁷ Doar zee Petrus op: "Aan dizze lu kin we toch t deupwotter nait waaigern? Ze hebben Hillege Gaist ja kregen, net as wie ook!" ⁴⁸ Hai gaf opdracht heur te deupen in Jezus Christus zien noam. Dou vruigen ze hom nog n poar doag te blieven.