Geloaten 5

Ain van baaident: genoade of wet

¹ Dat we vrij wezen zollen, doarveur het Christus ons vrijmoakt. Holdt kop ter den ook veur en boegt joen nek nait vannijs onder n sloavenjuk. ² Zel ik, Paulus, joe ais wat zeggen? As ie joe besnieden loaten, zel ie niks meer aan Christus hebben! ³ Ik verzeker joe nog n moal: elkenain dij zok besnieden let, dij zit ter aan vaast haile wet noa te kommen. ⁴ Ie binnen ofsneden ²⁹ van Christus, ie dij joen vrijsproak van wet verwachten; genoade, doar bin ie oet zet. ⁵ Wié verwachten ja van t geleuf vrijsproak deur de Gaist. ⁶ As ie ain mit Christus Jezus binnen, moakt t ja gain verschil, of ie aal of nait besneden binnen. t Ainegste doar of t op aan komt is t geleuf, dat teweeg brocht wordt deur laifde.
⁷ Ie wazzen zo mooi op glee. Wèl het joe der van òf brocht joe aan woarhaid te holden? ⁸ Dij ingeven kwam nait van Hom dij joe ropt. ⁹ "n Luk stokje gèst ter in, en t haile daig wordt zuur." ³⁰ ¹⁰ Nou vertraauw ik, wat joe aangaait, wel op ons Heer, dat ie niks verkeerds in t zin hebben zellen. Mor dij joe kop gek moakt, dij krigt zien straf! t Kin niks schelen, wèl of t is.
¹¹ En om op miezulm te kommen, bruiers (en zusters): as mien bosschop nou nóg is: 'Loat joe besnieden!', woarom zitten ze mie den nog achter de vodden? Den heb ik t kruus, doar zai over valen, ja opgeven! ¹² As ze den toch wat ofsnieden willen, mozzen ze t zokzulm mor doun, dij lu dij bie joe boudel op kop zetten.