Geloaten 3

Zegend mit Oabram

⁶ Neemt nou Oabram. "Hai leufde God, en dat wer hom as gerechteghaid aanrekend." ⁶ ⁷ Ie zain dus: mensken dij t van t geleuf verwachten, dat binnen Oabram zien kinder. ⁸ Schrift haar al veuròf zain: God zel haaidens vrijspreken op grond van heur geleuf. Doarom het zai veuròf aan Oabram t bliede nijs brocht: "In die zellen ale volken zegend worden". ⁷ ⁹ Mensken dij t van t leuven verwachten worden dus zegend soamen mit geleuvege Oabram.
¹⁰ Aansom: wèl of t van t noakommen van wet verwachten, op dij ligt n fluik. Der staait ja: "Verflukt is elk dij zok nait aan ale veurschriften van t wetbouk holdt en dij noakomt." ⁸ ¹¹ Dat gainain deur wet bie God vrijsproak krigt, is n dudelke zoak. Der staait ja: "Rechtveerdege zel leven oet t geleuf". ⁹ ¹² Bie wet komt t nait op leuven aan! Nee, doar geldt: "Wèl dat dút zel doardeur leven". ¹⁰
¹³ Christus het ons löskocht van fluik dij wet ons oplegt deur zulm veur ons n fluik te worden. - Der staait ja: "Verflukt is elk dij aan n poal ophongen wordt"-. ¹¹ ¹⁴ Den kon Oabram zien zegen deur Jezus Christus bie haaidens terecht kommen; en den konden wie deur t geleuf de Gaist kriegen dij ons touzegd was.