Geloaten 3

Testement en wet

¹⁵ Bruiers, t is menskenwereld mor, doar of ik t mit vergeliek; mor dat dut ter niks aan òf. Ook n mensk zien geldeg testement kin gainain aan kaant schoeven of ter nije bepoalens bie moaken. ¹⁶ Nou wazzen touzeggens aan Oabram doan en aan zien ofstammeling. God zegt nait: "en aan dien ofstammelingen", asof t om n haile koppel ging; nee, omdat t op mor ain doult, zegt E: "en aan dien ofstammeling". ¹² En dat is Christus. ¹⁷ Dit is mien zeggen: vrouger al haar God n geldeg testement moakt. Eerst vaaierhonderddaarteg joar loater komt ter n wet. Dij moakt dat testement nait ongeldeg, zodat ter niks meer kommen zol van wat of doarin touzegd was. ¹⁸ Zol aarvenis ja van wet ofhangen, den nait meer van touzeggen. Mor t was n touzeggen, doar God Oabram mit begunstegd haar!
¹⁹ (Nou zel ie vroagen:) "Wat mout dij wet den?" Nou, dij is ter bie doan om overtredens aan te teunen ¹³ tot ofstammeling kommen wezen zol op wèl of touzeggen vaastzet was. Der keken engels op tou, dou e opmoakt wer. En n tussenpersoon ¹⁴ kreeg hom in bewoar.
²⁰ "Mor n tussenpersoon bindt zok nait aan ain pertij. En God is mor ain pertij!" ¹⁵
²¹ Dus (ie wollen mor zeggen:) wet kon wel ais in t noadail van God zien touzeggens oetpakken? Nooit van zien levensdoagen! Was ter ja n wet geven dij je leventeg moaken kon, zeker, den zol je op grond van wet vrijsproken worden kinnen. ²² Mor nee, hur! Dij wetstekst het t haile zootje opsloten achter poort doar boven staait: "zunde". ¹⁶ Den kon wat of touzegd was, op grond van t geleuf in Jezus Christus geven worden aan wèl of leuven.
²³ Veurdat t geleuf kwam, ston we onder bewoaken van wet. Wie zatten vaast in ofwachten van t geleuf dat opdoagen zol.