Geloaten 1

Hou of Paulus apostel wer

¹⁰ Wat denk ie wel? Zol t mie om mensken heur gunst te doun wezen of om God zienent? Perbaaier ik t mensken noar t zin te moaken? As ik dat nou nóg dee, zol k nait bie Christus in dainst wezen.
¹¹ Dit wil k joe nog wel zeggen, bruiers: t evengelie dat ik brocht heb, is nait op mensken ofstemd. ¹² Ik heb t ook ja nait van n mensk kregen. t Is mie nait leerd. Nee, Jezus Christus het mie t openboard.
¹³ Ie hebben ja vast wel heurd, dat ik eertieds pertij van Jeudse drievers aanhong. Dat ik, meer as wèl ook, God zien gemainte vervolgde en dij verinneweerde. ¹⁴ Ik brochde t in dat Jeudse drieven wieder as n bult jonges van t zulmde older onder ons volk. Zo fel kwam ik op veur regels, dij wie van ons olders deurkregen haren.
¹⁵ Mor God haar - al van veur mien geboorte òf aan - mie apaart holden en roupen deur de goaven dij E mie gaf. Dou Hai t tied von ¹⁶ zien Zeun in mie veurndag kommen te loaten, om Dij aan haaidens te verkundegen, heb ik den ook van stonden òf aan gain mensk meer om road vroagd. ¹⁷ k Bin ook nait noar Jeruzelem tou raaisd, noar dijent dij al eerder as ik apostels wazzen, mor ik bin noar Aroabie goan, en dou weerom noar Damascus. ¹⁸ Eerst drij joar loater bin k noar Jeruzelem tou goan om Kefas op te zuiken. Bie hom bin k twij week bleven. ¹⁹ Ain van aander apostels heb ik nait zain. Wèl nog Jakobus, ons Heer zien bruier.
²⁰ Wat ik joe nou schrief ... denkt ter om: dat laig ik nait! God kin t getugen.
²¹ Loater kwam ik in kontraainen van Syrie en Cilicie. ²² Christelke gemaintes in Judeoa konden mie nait van aanzain. ²³ Wat ze heurden was nait meer as: "Dij man dij ons doudestieds vervolgde, verkundegt nou de leer dij e vrouger mit ale geweld bestree!" ²⁴ En ze prezen God om wat of ter mit mie gebeurd was.