Filippiërs 4

Daank veur t helpen

¹⁰ Ik bin der slim blied om in de Heer, dat ie der nou ook es weer aan tou kommen kinnen om mie te denken. Ie haren doar wis voak om docht, mor gelegenhaid ter tou was ter ja nait. ¹¹ Doar wil k nait mit zeggen, dat k nait genogt heb. k Heb ja wel leerd mie te behelpen - hou den ook. ¹² k Wait wat of aarmoude is, en k wait wat of overvloud is. Van alles en nog wat heb k ondervonden: zat worden en honger lieden, overvloud hebben en gebrek lieden. ¹³ Dat alles kin k aan, deur Hom dij mie kracht geft.
¹⁴ Toch heb ie der goud aan doan dat ie mitleefd hebben dou t ter kneep.
¹⁵ Ie doar in Filippi waiten zulm ook ja wel: in t begun van mien verkundegen van t evengelie bie mien vertrek oet Macedonie, was ter gain ain aander gemainte doar ik n lopende reken van oetgoaven en ontvangsten haar, as allain bie joe. ¹⁶ Al in Tesseloníkoa heb ie mie n moal of wat hulp stuurd. ¹⁷ t Is mie der nait om te doun dat k wat krieg, mor dat ie vrucht droagen, dij joen tegoud groder moakt. ¹⁸ Nou heb ik t haile bedrag kregen. En alderdeegs nog meer! Ik heb meer as genogt, sunt dat ik van Epafroditus kregen heb wat of ie mie stuurd haren. n Reukovver, dat God op pries stelt, dat Hom aanstaait. ¹⁹ Mien God zel joe alles geven woar of ie verlet om hebben. Hai is ja riek aan heerlekhaid (dij Hai teund het) in Christus Jezus. ²⁰ Eer aan ons God en Voader, ale aiwen deur. Amen.