Filippiërs 4

Paulus geft road

¹ Mien bruiers (en zusters), dij k zo geern lieden mag en noar wèl of k zo verlang, mit wèl of k zo wies bin, mit wèl of k veurndag kommen kin, stoat zo vaast in Heer, lu!
² Euodia en Syntyche vermoan k, ainsgezind te wezen in de Heer. ³ k Vroag die ook, mien traauwe vrund: wees heur behulpsoam. Zai hebben ja in t verkundegen van t evengelie noast mie streden. Net as Clemens en mien aander mitaarbaiders dij heur noamen in t levensbouk stoan.
⁴ Weest blied in de Heer, aaltied! k Zeg joe t nog es weer: weest blied!
⁵ Loat elkenain vernemen, hou vrundelk of ie binnen. De Heer is stoefbie. ⁶ Moakt joe naargens gain zörgen over, mor loat God waiten wat of ie neudeg hebben. Bidt en smeekt Hom. En vergeet nait te daanken. ⁷ Den zel God zien vree, doar of wie mit ons verstand nait bie kinnen, woaken over joen haarten en over joen gedachten in Christus Jezus.
⁸ En nog wat, bruiers (en zusters):
aal wat of betraauwboar is en weerdeg,
aal wat of eerlek is en zuver,
aal wat of in smoak vaalt en joe op n goie noam brengt,
as ter wat is dat woardeerd wordt en prezen,
dout doar denk om.
⁹ Wat of ie van mie leerd en deur kregen hebben,
heurd en zain hebben,
goat doar noar te waark.
Den zel God, dij vree geft, mit joe wezen.