Filippiërs 2

Christus zien veurbeeld

¹ As t wat helpt joe in Christus te vermoanen of joe vol laifde tou te spreken, as t joe wat zegt dat wie deur de gaist aan nkander bonden binnen, dat mien haart noar joe oetgaait en ik mit joe te doun heb, ² dout den wat of ik geern wil, deur aindrachteg te wezen. Leeft in dezulmde laifde. Weest ain van zin en weest op ain ding oet. ³ Dout niks oet eerbejag of iedelhaid, mor weest beschaaiden. En hebt van aandern n hogere dunk as van joezulm. ⁴ Ie mouten nait op joen aigen belang bedocht wezen, mor (ook) op aandern heurent. ⁵ t Mout joe te doun wezen woar of t Christus Jezus ook om te doun was.
⁶ Dij haar t aanzain van God
en toch sluig Hai der gain munt oet
dat E mit God geliek ston.
⁷ Nee, Hai het zien heerlekhaid oflegd,
en is in zien veurkommen net as n sloaf worden.
Hai wer aan mensken geliek
en kwam veur n dag in menskengedoante.
⁸ Hai het zokzulm deel zet
deur zok geheurzoam te gedroagen aan dood tou.
Joa, alderdeegs dood aan t kruus.
⁹ Doarom het God Hom den ook t allerhoogste stee geven
en Hom n tuddel verlaind
hoger as elke aander tuddel.
¹⁰ Dat elkenain knij boegen zel
veur Hom, dij Jezus hait.
In hemel, op wereld en onder wereld.
¹¹ En in elke toal beleden worden zel:
Jezus Christus is Heer!
Tou eer van God, de Voader.