Efeziërs 6

Woapent joe!

¹⁰ Nou nog n leste woord: zuikt joen kracht in de Heer, in zien staarke macht. ¹¹ Trekt God zien woapenrusten aan; den kin ie t opnemen tegen duvel zien loze streken. ¹² Ons gevecht gaait ja nait tegen mensken van vlaais en bloud, mor tegen wat of ter in dit duustern aan regenten, boazen en grootmachten touholdt; tegen kwoaie geestelke machten dij in hemelse kontraainen hoezen. ¹³ Doarom mout ie God zien woapenrusten aandoun. Den kin ie joe te weer stellen, as t kwoad zien slag sloagen wil, t aal tou n goud ènd brengen en t op n bainen holden.
¹⁴ Doarom: op joen post! Bindt woarhaid om as n raim. Trekt rechtveerdeghaid aan as n kuras. ¹⁷ ¹⁵ Bindt joen sandoalen mor onder, kloar om goie bosschop van vree over te brengen. ¹⁸ ¹⁶ Holdt bie aal joen akties joen geleuf vaast as n schild. Doar kin je duvel zien glìnne pielen altmoal mit oet kriegen. ¹⁷ Zet helm van redden op en pakt t sweerd van de Gaist, dat is te zeggen: God zien woord.
¹⁸ Doarbie mout ie aalgedureg deur de Gaist God mit aandrang aanroupen mit allerhande beden. Joa, apaart doarveur zol ie mor ais opblieven, om onverdrutsoam te smeken veur ale haailegen. ¹⁹ Ook veur mie: dat mie t rechte woord ingeven worden mag, as k mond open dou; om zo vrijoet t gehaim van bliede bosschop bekend te moaken, ²⁰ doar k ambassadeur veur bin, schoon dat ik vaastzit; dat ik dat vrijoet vertellen duur, zo as ik dat mout.