Efeziërs 5

Onderdoaneghaid

²¹ Weest mekoar onderdoaneg oet eerbied veur Christus: ²² vraauwlu aan heur manlu, as aan de Heer. ²³ Man is ja t hoofd van zien vraauw, net as Christus t hoofd van kerk is, van zien liggoam, dat E zulm in leven holdt. ²⁴ Nou, zo as kerk onderdoaneg is aan Christus, zo mouten vraauwlu dat aan heur man wezen in ale opzichten.
²⁵ Ie, manlu, hebt joen vraauwen laif, net as Christus zien kerk laif had het en zokzulm veur heur opovverd het. ²⁶ Dat dee E om heur te haailegen. Doarveur het E heur zuverd deur heur in bad te doun en heur doarbie aan te spreken. ¹³ ²⁷ Den kon E zien kerk bie zok aandainen as n vraauw dij n goie noam het, zunder vlek of rimpel of zuks wat. Ze zol haaileg wezen; je moggen niks op heur ofgeven kinnen. ²⁸ Zo mouten ook manlu heur vraauwen laif hebben; dij binnen ja zo te reken heur aigen liggoam. Wèl of van zien vraauw holdt, holdt van zokzulm (²⁹ Nog nooit het n mensk ja zien aigen liggoam hoat. Aansom: hai geft t te eten en klokkert t op.), net as Christus van zien kerk. ³⁰ Wie binnen ja leden van zien liggoam. ³¹ Doarom zel n man bie zien pa en moeke vandoan goan en zok aan zien vraauw hechten. Zo zellen dij twij tou ain worden. ¹⁴ ³² Dat is n daip gehaim. Nou loat ik dat wel op Christus en kerk sloagen, ³³ mor liekegoud geldt dat joe ook ain veur ain: elk mout zien aigen vraauw zo laif hebben as zokzulm. En vraauw mout ontzag hebben veur heur man.

6

¹ Kinder, weest joen olders geheurzoam nou ie bie de Heer heuren: ¹⁵ dat is joen plicht. ² Ie mouten joen pa en moeke in ere holden. ¹⁶ Dat gebod staait bovenaan. En doar is dizze touzeggen bie: ³ den zel t joe goud goan en zel ie laank leven op dizze wereld.
⁴ En ie, voaders, ie maggen joen kinder nait op staang rieden. Nee, ie mouten ze grootbrengen zo as ons Heer zien kinder opvudt en terecht wist.
⁵ Sloaven, geheurzoamt wèl of hier joen boazen binnen mit respekt en ontzag. Dat mout joe ainmoud wezen, asof t Christus gol. ⁶ Nait zo, dat ie mensken noar ogen kieken om bie heur in gunst te kommen, mor as Christus zien sloaven, dij bliederhaarten doun wat of God wil. ⁷ Wèl of ie dainen mout ie tougedoan wezen, net of haar ie de Heer veur en gain mensken. ⁸ Ie waiten ja: elkenain krigt t goie dat e dut van de Heer weerom, krekt geliek of e sloaf is of vrij man.
⁹ En ie, boazen, behandelt joen sloaven net zo. Loat draaigementen achterwegens. Beseft, dat zai en ie heur Heer in hemel hebben, en dat Dij gainain veurtrekt.