Efeziërs 5

Leven in t licht

¹ Ie binnen God zien laive kinder. Perbaaiert doarom zo te leven as Hai. ² Loat laifde op joen levent heur stempel drokken. Zo het Christus ons ja ook laif had en zokzulm veur ons opovverd. Dat was nog ais n ovver dat God lekker tourook!
³ Klongeln of wat veur onzedelkhaid den ook, of aalbegereghaid, doar mag ie nait ainmoal over proaten. Zukswat paast haailegen nait. ⁴ Net zo min voelbekken en male proat of zo mor wat teuten. Dat heurt zo nait. Ie zollen mor laiver God priezen. ⁵ Hier mout ie ja mor op reken: wèl of klongelt of onzedelk en aalbegereg is - zeg mor: wel n ofgod daint - het gain aarfdail in Christus en God zien Riek.
⁶ Loat joe deur gainain wat wiesmoaken; wat of ze joe veurholden, doar komt niks van oet. Nee, om zukse dingen gaait God nou juust dij lu stravven dij nait om zien zeggen geven. ⁷ En dus: dout doar nait aan mit. ⁸ Vrouger zat ie in duustern, mor nou het de Heer t bie joe licht worden loaten. Loat den aan joen gedrag zain, dat ie bie t licht heuren. ⁹ Allenneg in t licht kinnen goudhaid, rechtschoapenhaid en eerliekhaid ja volop wazzen, ¹⁰ deurdat ie joe ofvroagen, wat of de Heer noar t zin is. ¹¹ En dout nait mit aan wat of t duustern omhaans het; dat smit ja niks op. Of beder nog: stelt dat aan de koak. ¹² Wat dizze lu stiekem oetvreten ... ie zollen joe schoamen dat ook mor te nuimen! ¹³ Mor dat wordt altmoal deur t licht aan de koak steld; en zo komt t in openboarhaid. ¹⁴ Alles dat in openboarhaid komt is ja licht. Zo kom we aan dat laid:
Wor wakker, doe sloapkop!
Stoa op oet dien graf!
Den zel Christus as zun veur die opgoan.
¹⁵ Kiekt ter dus schaarp op tou hou of ie leven; nait onwies, mor klouk ¹⁶ deur joe der vrij veur te moaken, as gelegenhaid ¹² zok veur dut. t Is ja n verdurven wereld doar of we vandoag in leven. ¹⁷ Weest doarom nait onverstandeg, mor perbaaiert te begriepen wat of de Heer wil.
¹⁸ En drinkt joe nait onbekwoam aan draank; doar komt mor lösbandeghaid van. Mor loat joe vollopen mit de Gaist. ¹⁹ Utert joe tegen nkander in psaalms, gezangen en geestelke laiden. Zingt en speult van haarten veur de Heer. ²⁰ Brengt altied veur alles daank aan God de Voader in noam van ons Heer Jezus Christus.