Efeziërs 4

Allerhande goaven

⁷ Mor elk van ons apaart het zoveul genoade toudaild kregen as Christus hom tou wol. ⁸ Doarom staait ter ook:
"Hai is noar zien hoge woonstee goan
mit lu bie zok dij E kriegsgevangen moakt haar;
Dou het E mensken goaven schonken." ⁷
⁹ Dat "noar zien hoge woonstee goan", wat zol dat aans beduden as dat E eerst daip in eerde ⁸ ofdoald is? ¹⁰ Dij deelkommen is, is zulmde dij ook opvoaren is, hoger as ale sferen, om zo t heelal haildaal in beslag te nemen. ¹¹ En Hái het summegen geven as apostels, aandern as perfeten of as evengelisten, weer aandern as hedders en leroars, ¹² om haailegen kloar te moaken veur heur dainst, dat ze Christus zien liggoam opbaauwen konden. ¹³ Net zo laank tot wie altmoal ain binnen in t geleuf en God zien Zeun gelieke goud kennen; tot wie n wazzen kerel worden binnen, oetgruid tou n pestuur van dezulmde volle moat as Christus. ¹⁴ Den bin we nait laanger slaiven, dij zok op en deel gooien en rondslingern loaten deur elke wind dij der opstekt in de leer, en zok zo deur mensken mit filaaine streken - zo as dwoalleroars dij te boat nemen - verkwaanzeln loaten. ¹⁵ Nee, den zel we, deurdat we in laifde traauw blieven, in ale opzichten aalaan meer noar Hom tou gruien dij ons hoofd is: Christus. ¹⁶ Van Hom krigt t haile liggoam zien grui. t Wordt ja zo in nkander zet, dat ter overaal verbindens aanbrocht worden. Doarlaans kin elk dail ofzunderliek noar moat van zien vermogen deurgeven wat of e kregen het. Zo waarkt t liggoam zulm mit aan zien aigen opbaauw en laifde.