Efeziërs    4

¹⁷ Dit is dus mien zeggen, dit drok ik joe in ons Heer zien noam op t gemoud: gedroagt joe nait laanger zo as haaidens. Van wat of zai in t zin hebben komt ja niks te vlocht, ¹⁸ verduusterd as ze binnen in heur denken, boeten t levent mit God as ze stoan. Dat komt van t onverstand dat in heur hoest, van ongevuilighaid van heur haart. ¹⁹ Zukke mensken binnen ofstompt. Zo gingen ze der mor op lös leven en kwammen der tou allerhand schaauwe dingen te doun. Doar kinnen ze nait genog van kriegen.
²⁰ Mor ie hebben toch dít van Christus opstoken ²¹ - ie hebben ja van Hom heurd en binnen in Hom onderwezen - : nou in Jezus t woare kommen is, zol ie ²² joe omklaiden: olde mensk, zo as dij vrouger zok aanstelde, mout oet! Dij ging ja kepot aan dingen dij hom as begeerliek veurspaigeld werden. ²³ En ie mouten joen instellen ombatterijen loaten: ²⁴ nije mensk mout aan! Dij is zo schoapen, dat e noar God oardt. De woarhaid dut hom rechtschoapen en haaileg leven.
²⁵ Doarom: dout leugen aan kaant en spreekt onder mekoar woarhaid. ⁹ Wie binnen ja leden van ain liggoam?
²⁶ Wordt kop joe ais roeg? Dut niks; mor bezundegt joe nait. ¹⁰ Wordt weer goud, veurdat zun ondergaait, ²⁷ en geeft duvel gain kaans. ²⁸ Wel wend is te stelen mout ter mit opholden. Hai zol zok mor laiver goud verweren en mit zien twij handen doun wat of deugt. Den kin e ain dij verlet het ook ais wat geven. ²⁹ Loat joe gain onnuur woord tou mond oetkommen. Nee, (spreekt allenneg) as ie wat gouds te zeggen hebben, dat ... ¹¹ opbaauwt. Den hebben wèl of t heuren der wil van.
³⁰ Dout God zien Hillege Gaist gain verdrait. Dij is ja t maark dat joe opdrokt is mit t oog op dag dat ie verlöst worden. ³¹ Vot mit ale bidderhaid, grammiedeghaid, opvlaigendhaid, roazen en fluiken en wat veur lek of brek ie wieder hebben maggen. ³² Weest goud en haartelk veur nkander. Vergeeft mekoar, net as God joe in Christus vergeven het.

© 2000 Liudgerstichten. All rights reserved.