Efeziërs 3

Wat veur opdracht of Paulus kreeg

¹ Dat is veur mie, Paulus, nou ik om Christus gevangen zit, n reden veur joe, haaidens, ... ⁴ ² Ie hebben ja wis wel heurd, dat mie t gund is God zien genoade aan joe oet te dailen. ³ Deur n openboaren het E mie t gehaim bekend moakt, zo as ik zonet ⁵ al in t kört schreef. ⁴ En doaroet kin Ie, as ie t lezen, wel opmoaken, hou zo n inzicht ik heb in Christus zien gehaim. Doarvan was in veurege generoatsies aan mensken nait zoveul bekend moakt, as ter nou aan zien hillege apostels en perfeten deur Gaist van bloot geven is. ⁶ Dit gehaim: haaidens zollen mit ons aarven, mit ons inliefd worden, mit ons dailen in wat of in Christus Jezus beloofd was. Dat zol gebeuren deur t evengelie.
⁷ En dij bosschop mog ik rondbrengen. Doarveur kreeg ik van God de goaven; doarveur luit E in mie zien staarke krachten waarken. ⁸ Ik, nou net alderlutjeste maank zien haailegen, kreeg dizze gunst: aan haaidens Christus zien schat te verkundegen, dij gain mensk op t spoor kommen kon, ⁹ en op te heldern, hou of t wereldbestuur der oetzag in dat gehaime plan, dat God, dij alles schoapen het, van tiedstieden heer veur zok holden haar ¹⁰ mit dij bedoulen dat nou deur kerk aan heersers en machthebbers in hemelse kontraainen God zien wieshaid in geuren en kleuren bekend moakt worden zol. ¹¹ Zo haar E zok dat aiwen leden veurnomen in ons Heer Christus Jezus. ¹² Deur Hom kin we nou frank en vrij noar God tougoan, vol vertraauw as we binnen deur ons geleuf in Hom. ¹³ Doarom vroag ik joe: loat moudveren nait hangen, nou ik om joe der onderdeur mout. Dat mag joe ja tou eer strekken.