3 Johannes 1

Daarde braif van Johannes

¹ Van oldste.
Aan mien beste Gajus, dij ik zo aibels geern lieden mag.

² Mien jong!
In eerste ploats hoop ik, dat t goud mit die gaait. Dastoe goud zond bist noar liggoam en gaist.
³ k Was ter slim blied om, dat bruiers dij hier op bezuik kwammen, mie vertelden over dien levent in de woarhaid. Zo gaait t bie joe ja ook. ⁴ k Bin naargens méér blied om, as dat ik zukswat van mien kinder heur.

⁵ t Is mooi van die, mien jong, zo astoe mit de bruiers omgaaist. Ook al binnen t vremden veur die. ⁶ In gemainte hier hebben ze van dien laifde verteld. Doe dust ter goud aan heur wieder te helpen op raais. En wel zo, dat God doar mit eerd wordt. ⁷ Om de Noam binnen ze ja op pad goan, zunder wat van haaidens aan te nemen. ⁸ t Is ons plicht zukse lu bie ons op te nemen. Zo waark we der aan mit, dat woarhaid verkundegd wordt.

⁹ Ik heb gemainte n braif schreven, mor Diotréfes wil niks mit ons van doun hebben. Hai wil zulm geern op eerste raang zitten. ¹⁰ As ik kom, zel ik t zeker over zien gedrag hebben. Nait allenneg streut e lasterproatjes over ons rond, mor of t nog nait mooi genog is, de bruiers wil e ook nait in hoes hebben. En dij dat aal doun wil, waarkt e tegen en zet ze alderdeegs oet gemainte.
¹¹ Mien jong, dou t kwoad nait noa, mor t goie. Dij goud dut, heurt bie God. Wèl t verkeerde dut, het God nait zain.
¹² Gainain wil n kwoad woord heuren over Demétrius. Ook woarhaid zulm nait. Wie leggen ook n goud getugenis over hom òf en doe waist dat ons zeggen woar is.

¹³ Ik heb die nog n haile bult te schrieven, mor dou dat laiver nait mit pen en inkt. ¹⁴ Ik hoop die gaauwachteg te zain. Den kin we t onder nkander beproaten.
¹⁵ Ik wèns die vree tou!
De groeten van ons vrunden. Dou dien vrunden ook altmoal persoonlek de groeten.