2 Timoteüs 4

Nijs over mitwaarkers en tegenstanders

⁹ Dou dien bèst gaauw bie mie te kommen. ¹⁰ Demas het mie ja zitten loaten, omreden hai het zien haart aan dizze wereld geven. En zo is hai noar Tesseloníkoa goan. Crescens noar Geloatie, Titus noar Dalmoatie. ¹¹ Allain Lucas is nog bie mie. Hoal Marcus aan en neem hom mit. Ik kin hom ja bèst bruken om mien toak noa te kommen. ¹² Tychikus heb k noar Efeze tou stuurd. ¹³ Neem, astoe komst, mien jak mit, dij k in Troäs bie Karpus liggen loaten heb; en mien bouken, benoam mien aantaikenboukje.
¹⁴ Kopersmid Alexander het mie n bult lèlke streken lapt; de Heer zel hom betoald zetten wat of e doan het. ¹⁵ Woar doe die ook tegen hom. Hai is ja slim in verzet kommen tegen wat of wie zeden.
¹⁶ Eerste moal dat ik veur kommen mos, is ter gainain bie mie kommen; altmoal hebben ze mie zitten loaten. Mag heur t nait aanrekend worden. ¹⁷ Mor de Heer het mie biestoan en mie kracht geven. Den kon deur mie t oetdroagen van bosschop haildaal zien beslag kriegen en konden ale haaidens dij heuren. En ik bin red oet laif ⁶ zien bek. ¹⁸ De Heer zel mie veur ale gemaine aansloagen bewoaren en mie beholden in zien riek in hemel brengen. Hom de eer veur aiweg en aaid! Zeker woar!