2 Timoteüs 3

Swoare tegenstand; en hou woapen ie joe doartegen

¹ En wait dit wel: Loater zellen der swoare tieden aanbreken. ² Mensken zellen den op aigenbelang oet wezen en op geld; opscheppers, dij zok hail wat verbeelden. Ze streuen proatjes rond, binnen heur olders ongeheurzoam; ondankboare en godvergeten lu. ³ Van laifde hebben ze gain wait; ze worden nooit weer goud op ain, zetten mensken tegen nkander op, binnen onmoateg en grof, en mouten van wat goud is niks hebben. ⁴ Verroaders binnen t en woaghaalzen; ze kinnen wind vlaigen zain; geven meer om genot as om God. ⁵ Van vroomhaid holden ze schien nog op; inhold dervan hebben ze ofzegd. Blief zukkent ook oet de buurt. ⁶ Van dat loag binnen ja dij manlu, dij tou bepoalde hoezen insloepen en doar vraauwlu onder beslag kriegen dij allesbehaalve brandschoon binnen. Zai loaten zok mitslepen deur heur lusten; dij ale kanten hèngoan. ⁷ Zukke vraauwlu willen wel aaid wat nijs opdoun, mor kinnen der nooit tou kommen woarhaid te aanveerden. ⁸ Net zo as Jannes en Jambres tegen Mozes ingingen, zo goan dizze manlu ook tegen woarhaid in. Verdurven van karakter binnen ze; wat heur traauw aangaait mout ie zukkent nait hebben. ⁹ Mor heur invloud zel wel nait gruien. Hou dwoas of ze binnen, zel elkenain wel goud dudelk worden, net zo as dat mit dijent ook goan is.
¹⁰ Mor doe bist aaid in t spoor goan van mien onderwies, laaiden, bestek, traauw, geduld, laifde, mien volholden, ¹¹ as k achternoa zeten wer en t swoar te verduren haar, zo as mie bie veurbeeld in Antiochie, Ikonium en Lystra overkommen is. Wat hebben ze wat achter mie aanjagd!
Mor hailtied weer het de Heer mie der oet red. ¹² -Traauwens, áál dijent, dij mit Christus Jezus vroom leven willen, zellen achternoa zeten worden.- ¹³ Mor schobbejakken dij joe beetnemen, dij zellen aalaan meer in onderwaal belanden. Net zo haard as zai aandern mislaaiden, worden ze zulm mislaaid. ¹⁴ Mor hol doé die mor aan wat ofstoe leerd hest en aan wat of die aanvertraauwd is. Waist ja, van wèl ofstoe t leerd hest. ¹⁵ Vot as jonkje al wastoe ja bekend mit dij haailege geschriften, dij die zo wies muiken, dastoe deur in Christus te leuven die redden luitst. ¹⁶ Altmoal binnen dat geschriften dij Gód mensken ingeven het, en doar ie veul aan hebben veur joen onderwies, veur joen verweer, om mensken weer op t rechte pad te brengen en ze op te vouden tou n rechtschoapen levent. ¹⁷ Zo kin n mensk dij bie God heurt veerdeg worden, kloar om alles te doun wat of mor goud is.

4

¹ Ik besweer die ten overstoan van God en van Christus Jezus, dij over leventegen en doden vonnis wiezen zel, wanneer dat ⁴ E as keunenk verschient: ² zeg bosschop rond, spreek mensken der op aan, of heur t gelegen komt of nait, roup heur tou verantwoorden, bestraf heur, spreek heur moud in. Doar hest aal dien geduld en bekwoamhaid om te onderwiezen bie neudeg. ³ Der zel ja n tied kommen, dat ze gezonde leer nait laanger oetstoan kinnen. Den zellen ze zok n haile bult leroars aanhoalen, elks noar zien aigen smoak; zo tezzel binnen ze op wat of ze heuren. ⁴ Onder t geheur van woarhaid zellen ze vandoan goan en t zuiken bie opbedochte verhoalen. ⁵ Mor wees doe in ale omstandegheden nöchtern, verduur t lieden, dou wat of n evengelist te doun het, moak dien toak doan.