2 Timoteüs 2

Wees verdocht op dwoalens

¹⁴ Hol ze dat mor aaltied weer veur. En zeg heur aan mit n beroup op God, dat ze dat bekvechten loaten. Dat is naargens tou nut; dat kin ondergang worden veur wèl of t heuren. ¹⁵ Dou dien best die aan God te geven as ain doar E op aan kin, as n aarbaider dij zok nait huift te schoamen; dij in t verkundegen van woarhaid recht deur zee gaait. ¹⁶ Mor hol die boeten dat aaldoags gerevel. Wèl doaraan begunnen zellen t pad van goddelooshaid ja aal wieder opgoan. ¹⁷ En wat of zai verkundegen zel deurvreten as kanker. In Hymenéüs en Filétus heb je van dat volk. ¹⁸ Dij binnen t spoor van woarhaid biester worden mit heur zeggen: "Opstanden het al west". Zo gooien ze bie paardie mensken t geleuf ondersteboven. ¹⁹ Liekegoud: God zien steveg fonnement blift wel in t èn. ¹ As maark staait ter op: "De Heer kin dijent dij bie Hom heuren der wel oet!" ² en "Wèl of de Heer zien noam in mond nemt, mout gemaineghaid aan kaant doun". ³
²⁰ In n veurnoam hoes is behaalve golden en zulvern ook holten en stainen keukenriw. Aan t eerste hecht je weerde; t leste is nait in tel. ²¹ As nou den ain zok schoon wast van voeleghaid, den zel e n stok riw wezen doar weerde aan hecht wordt; dat apaart zet is; dat zien boas goud van pas komt; dat kloar staait veur ale goud dat ter te doun is. ²² Woar t jonkgoud zien zinnen op zet, dat mostoé loaten. t Mout dié te doun wezen om rechtschoapenhaid, traauw, laifde, n goie verholden mit lu dij de Heer mit n zuver haart aanroupen. ²³ Mor dij haalfwieze en domme hikhakkerijen, doar mostoe niks van waiten willen. Waist ja dat ter roezies van kommen. ²⁴ Mor wèl bie de Heer in dainst is, mout gain roezie moaken, mor tegen elkenain vrundelk wezen, kundeg om te onderwiezen en verdroagsoam. ²⁵ Wèl dwaars binnen mout e zaachtmoudeg terechtwiezen. Wèl wait brengt God heur nog ais tou aander gedachtens, zodat ze woarhaid aanveerden ²⁶ en weer zo nöchtern worden, dat ze zain oet duvel zien struup lös te kommen, doar e heur in vongen het om ze noar zien piepen daanzen te loaten.