2 Timoteüs 2

In t olde spoor wieder

¹ Nou den, mien jong, wees n kerel deur Christus Jezus zien genoade. ² Wastoe van mie heurd hest - en doar wazzen hail wat mensken getuge van - geef dat deur aan vertraauwde lu, dij bekwoam binnen op heur beurt weer aandern te onderwiezen.
³ Droag dien paart van t lieden as n goud soldoat van Christus Jezus. ⁴ Wèl in dainst is, huift zok ter nait drok om te moaken, dat e aan kost komt. Aans kin e lu dij hom huurd hebben t ja nait noar t zin moaken. ⁵ En wèl aan sport dut, krigt gain pries as e zok nait aan regels holdt. ⁶ Boer, dij t swoare waark dut, het t eerste recht op opbrengst. ⁷ Wat of ik nou zeg, dou doar denk om! De Heer zel t die ja aal onder t verstand brengen.
⁸ Hol Jezus Christus veur ogen, dij oet dood opstoan is, dij van Doavid ofstamt. Dát is mien bosschop ⁹ doar ik zo min om behandeld wor, dat ik nou alderdeegs kettens om heb, net of was ik n deugennait. Mor God zien woord zit nait aan ket. ¹⁰ Doarom wil ik alles wel verduren veur t beste van wèl of God oetkozen het. Den kinnen dij ook behold vinden in Jezus Christus, dat heur veur aiweg aanzain brengen zel. ¹¹ Hier kin je van op aan:
As wie ja toch mit Hom sturven binnen,
zel we ook mit Hom leven.
¹² As wie kop ter veur holden,
zel we ook mit Hom regaaiern.
Mor zol wié Hóm ofvalen,
den zel Hái óns ook ofvalen.
¹³ As wie ontraauw worden, Hai blift traauw:
Hai kin zokzulm ja nait ofvalen.