2 Tesseloníkers 3

Aan t waark!

⁶ En wat wie joe opdroagen, bruiers, in de Heer Jezus Christus zien noam is dit: loat elke bruier schaiten dij laiver lui as muid is en zok nait holdt aan veurschriften dij ze van ons kregen hebben. ⁷ Ie waiten ja zulm, hou of ie n veurbeeld nemen mouten aan ons. Wie binnen bie joe ja nooit veur t waark votlopen. ⁸ Wie hebben t brood dat we atten, nait van ain kedo kregen. Nee, wie hebben der dag en naacht veur krom legen, om mor gainain van joe tou last te wezen. ⁹ Nait dat we doar gain recht tou hebben. Mor wie wollen joe n goud veurbeeld geven, dat ie net zo doun zollen as wie ook. ¹⁰ Dou we destieds bie joe wazzen, heb we joe ja dizze opdracht geven: as ain nait waarken wil, den zel e ook nait eten.
¹¹ Wie hebben ja heurd, dat ter bie joe gounent binnen dij omdoameln; gain haand oetsteken, mor wel overaal heur neus in steken. ¹² Op gezag van ons Heer Jezus Christus droag we dat soort mensken op, en roup we heur der tou op, as oddènleke börgers aan t waark te goan, en zo heur aigen kost te verdainen.
¹³ En ie, bruiers, kriegt ter nait genog van om goud te doun. ¹⁴ As ain nait noar ons bevel, zo as we dat in dizze braif schreven hebben, lustern wil, maarkt hom den, zodat gainain meer verslag mit hom hebben wil. ¹⁵ Toch mout ie hom nait veur n vijand aanzain, mor hom as n bruier terechtwiezen.