2 Tesseloníkers 2

Woar of t wachten nog op is

¹ Nou we t ter toch over hebben, dat ons Heer Jezus Christus verschienen zel, en wie den bie Hom verzoameln mouten, vroag we joe, bruiers (en zusters): ² Loat joe nait zo gaauw kop gek moaken en van slag brengen deur n ingeven of n oetsproak of n braif - dij zo t hait van ons ofkomsteg is - of zol de Heer zien dag op handen wezen. ³ Loat joe deur gainain, op wat veur menaaier den ook, wat wiesmoaken. Eerst mout grode ofval ja kommen en dij persoon veurndag kommen dij om God noch gebod geft; dij riep is veur ondergang; ⁴ dij zok keert tegen en zok verheven woant boven elk dij god hait of noar wèl mit ontzag opkeken wordt, zodat e zien stee kaist in God zien tempel, om zain te loaten, dat hai zúlm god is. ⁵ Heugt t joe nait meer dat ik joe dit vertelde, dou k nog bie joe was? ⁶ En ie waiten wel, wat of nou nog tegenholdt, dat e veurndag komt. Dát gebeurt eerst, as zien tied ter heer is. ⁷ Dij veur ons nog duustere macht, dij zok van God en gebod ontdut, is ja al aan t waark. t Wachten is ter allain nog op, dat wèl dij nou nog tegenholdt, oet zied gaait. ⁸ En dén zel dij man dij om God noch gebod geft, veurndag kommen. Mor de Heer (Jezus) zel hom van kaant moaken deur zien (glìnne) ³ oam en hom lam sloagen deur zien goddelke verschienen, as E komt.
⁹ Dij man zien optreden, doar zit Soatan zien kracht achter. Hai waarkt mit allerhande verteun van macht, mit taikens en wonders dij Leugen hom aanlangt, ¹⁰ en mit allerhande bedrog oet Gemaineghaid zien koker. Dat is bedould veur mensken dij verloren goan. En dat hebben ze doaraan te daanken, dat ze Woarhaid zien laifde nait aannomen hebben, dij heur redden wol. ⁴ ¹¹ Doarom let God n kracht op heur lös dij heur der tou verlaaidt Leugen te vertraauwen. ¹² Den konden aal dijent dij Woarhaid nait vertraauwden, mor heur oardeghaid aan Gemaineghaid haren, veroordaild worden.
¹³ Mor veur joe, dij de Heer zien laiverds binnen, mout we God aalgedureg daanken, dat E joe as eersten oetzöcht het om te redden, deurdat zien Gaist joe haailegt en ie de woarhaid leuven. ¹⁴ Doarveur luit e joe roupen deur ons evengelie, dat ie t aanzain kriegen zollen dat ons Heer Jezus Christus het. ¹⁵ Nou den, bruiers (en zusters), zörgt ter veur, dat ie in t èn blieven, en holdt regels aan dij ie mondeling of schriftelk van ons leerd hebben.
¹⁶ En ons Heer Jezus Christus zulm en God, ons Voader, dij zoveul van ons huil, ons veur aaltied bemoudegde en ons wat gouds verwachten dee, zai maggen genoadeg ¹⁷ joen haarten opbeuren en moaken dat ie in aal joen doun en spreken vaastholden aan t goie.