2 Tesseloníkers 1

t Oordail as Christus komt

¹ Aan gemainte van Tesseloníkers
dij bie God, ons Voader,
en bie de Heer Jezus Christus heurt.

Paulus, Silvanus en Timoteüs ² wensken joe genoade en vree tou van God, de Voader, en van de Heer Jezus Christus.

³ Hailtied weer mout wie God om joe daanken, bruiers. Doar is reden tou: joen geleuf gruit van wonder en geweld en joen laifde veur mekoar wordt aalaan groder. ⁴ Wie snaren den ook over joe in God zien gemaintes, dat joen geleuf t oetholdt bie ale vervolgens en onderdrukkens, dij ie te verduren kriegen. ⁵ Doarmit moakt God dudelk, hou eerlek of E oordailt, as E vindt, dat ie t verdainen in zien riek te kommen. Veur dat riek lied ie toch zeker? ⁶ Nou, den vindt God t nait meer as eerlek, as E wèl of joe onderdrukken dat mit onderdrukken betoald zet, ⁷ mor joe, dij onderdrukt worden, mit ons op verhoal kommen let.
Dat zel wezen, as de Heer Jezus oet hemel veurndag komt mit engels doar Hai as heersker over beschikt. ⁸ Vuur en vlam spijend zel E den ofreken mit wèl of van God nait waiten wollen en aan ons Heer Jezus zien evengelie gain geheur gavven. ⁹ Veur straf zellen dijent veurgoud omkommen, wied oet de Heer zien buurt vandoan, wied weg van zien kolesoale glaans, ¹⁰ op t moment dat Hai komt om zok stoatsie biezetten te loaten deur zien haailegen ¹ en om zok bewondern te loaten deur aal dijent dij tou geleuf kwammen. Joe is ja geraanzie geven, ² dat wat of God ons getugen let, op dij dag gebeuren zel.
¹¹ Mit t oog doarop beed we ook aalaan veur joe, of ons God joe goud genog vinden mag om der in nuigd te worden; en of E - staark as E is - ale gouds doar ie zo n oardeghaid aan hebben en aal wat joen geleuf oet t stro zet, ofmoaken wil. ¹² Zo wordt ons Heer Jezus zien noam deur joe eer aandoan en aansom, aal noardat ons God en ons Heer Jezus Christus joe goaven geven hebben.