| |
| 1 | Halleluja! Priest God de HEER, |
| | priest hoog oet hemel, brengt Hom eer, |
| | priest Hom, zien haile legermacht, |
| | priest, engels Hom en droagt zien kracht. |
| | Loat, zun en moan, joen loflaid klinken, |
| | goat, steerns aan hemel, blied aan t zingen, |
| | en wotter boven hemelboog, |
| | tou, priest zien noam en holdt Hom hoog! |
| |
| 2 | Noam van de HEER: Ik bin dij is, |
| | wie priezen joen gehaimenis, |
| | want deur joen macht en joen bevel |
| | kreeg elk zien stee in dit bestel |
| | om doar as volk veur aaid te leven |
| | noar odders deur Homzulf heur geven. |
| | Hai temde zo aal heur geweld, |
| | Hai het doar poal en paark aan steld. |
| |
| 3 | Halleluja! Priest God de HEER, |
| | priest hoog zien noam van eerde heer. |
| | Ie, monsters in de daipe zee, |
| | speult veur de HEER en weest gedwee. |
| | Hoagel en vuur,wolken vol regen, |
| | störmwind en dook, goat op zien wegen, |
| | baargen doar snij zien klaid op spraaidt, |
| | dat aal joen daank noar Hom oet gaait. |
| |
| 4 | Aal wat op baarg en heuvel dijt, |
| | weest, bomen, mit joen vruchten rij, |
| | priest, sederholt, dat waast in t wold, |
| | wild en vij, dat op t veld touholdt, |
| | vogels dij zunder zörgen zingen, |
| | mensken en daaier, staarvelingen, |
| | dat aal wat vlugt en aal wat kropt |
| | zien bliedschop om t bestoan oetropt! |
| |
| 5 | Ie keunenks, overaal vandoan, |
| | en volken, dij rondom heur stoan, |
| | ie rechters mit joen amt bekled, |
| | en vorsten dij elk rechten geft, |
| | jonges en wichter mit mekander, |
| | olden en jongen, ain en aander, |
| | lu in heur olderdom en jeugd, |
| | verhoogt de HEER en weest verheugd! |
| |
| 6 | Noam van de HEER: Ik bin dij is, |
| | elk zegent dit gehaimenis. |
| | Wied boven eerd' en hemel gaait |
| | zien heerliekhaid dij bie ons staait. |
| | God is noabie en hoog verheven, |
| | Hai let zien volk in aanzain leven. |
| | Ook Izrels kinder aan zien zied, |
| | volk dat Hom noa staait, weest verblied! |
| |
