| |
| 1 | Ik roup Joe aan, God, heur mien kloagen, |
| | o HEER, ik bin der min aan tou, |
| | kom noar mie tou en help mie gaauw, |
| | ik heb zo aibels veul te droagen. |
| |
| 2 | Loat, HEER, mien gebed en mien handen, |
| | noar boven wiezen, op Joe richt, |
| | as wierook veur joen aangezicht, |
| | as ovvers dij bie oavend branden. |
| |
| 3 | Zet ain op wacht, HEER, veur mien lippen, |
| | loat mie nait spreken zunder grond, |
| | dat gain verkeerds komt oet mien mond, |
| | gain zundeg woord mag mie ontglippen. |
| |
| 4 | Loat t haart nait oetgoan noar t verkeerde, |
| | dat ik gain minne dingen dou |
| | mit manlu, o zo roeg en raauw. |
| | Loat mie heur zuitgoud nait begeren. |
| |
| 5 | Vrome lu dij mie klappen geven, |
| | van heur vaalt mie dat wis nait swoar, |
| | t is net as eulie op mien hoar, |
| | zai worden ja deur laifde dreven. |
| |
| 6 | Doun zai verkeerd, ik blief Joe smeken. |
| | Heur rechters dij ien onrecht doun, |
| | dij goan omdeel, noar ofgrond tou, |
| | zai heuren mie van laifde spreken. |
| |
| 7 | Boer dij doar plougt mit daipe vurgen, |
| | viendt aalaan vlinten, wied ien t rond. |
| | Zo kriegen bonken stee ien grond, |
| | veur mond van t dodenriek verburgen. |
| |
| 8 | Mor, HEER, op Joe sloag ik mien ogen, |
| | mien schoelhut ien dit open laand, |
| | hol mie ien leven ien joen haand, |
| | blief bie mie aal mien levensdoagen. |
| |
| 9 | Woar mie veur t klapnet dij zai spannen, |
| | veur strik deur vijand veur mie zet. |
| | Zai valen ien heur aigen net, |
| | ik goa mien gang, vrij van heur handen. |
| |
