Psaalm 118


1	De HEER is goud, loat elk Hom eren;
	zien goudhaid geldt ien aiweghaid.
	Loat Isrel zeggen, Hom ter ere:
	zien goudhaid geldt ien aiweghaid.
	Loat ook Aärons kiender zeggen:
	zien goudhaid geldt ien aiweghaid.
	loat dij de HERE vrezen, zeggen:
	zien goudhaid geldt ien aiweghaid.

2	Oet nood heb ik de HERE beden
	en ik kreeg antwoord van Hom dou.
	Hai het mie red oet swoaregheden
	en mouk weer roemte om mie tou.
	De HEER is mit mie, k huif nait vrezen
	al vlugt ter mie ook ain noar keel.
	De HEER wil ja mien helper wezen;
	zo kiek ik op mien hoaters deel.

3	t Is beder bie de HEER te schoelen,
	as dat ik baauw op menskenmacht.
	t Is beder bie de HEER te schoelen,
	as dat ik t van grootlu verwacht.
	Mit ale volken mos ik strieden,
	ik sloug heur deel ien s HEREN noam,
	zai drongen op van ale zieden,
	mor ik k sloug heur deel ien s HEREN noam.

4	Zai vlogen om mie tou as wepen,
	as strovuur binnen zai vergoan.
	Zai haren t aal op mie begrepen,
	mor k sloug heur deel ien s HEREN noam.
	Wat hebben zai mie stöt en sloagen,
	k was sikkom valen ien dij stried,
	zai deden mie ja niks as ploagen
	mor God, de HEER, ston aan mien zied.

5	Mien psaalm en staarkte is de HERE,
	dij mie zien haail en zegen brengt.
	Heur, hou zien volk, om Hom te eren,
	nou t laid van overwinnen zingt:
	"Zien rechterhaand dut grode doaden,
	de HEER zien haand verhoogt mit macht,
	joa, s HEREN rechterhaand dut doaden,
	dij spreken van zien grode kracht".

6	Ik zel nait staarven, ik zel leven,
	joa, leven! Deur joen kracht allain,
	veur elk en ain getuugnis geven,
	dat zai joen wonderwaarken zain.
	De HERE gaf mie swoar te droagen,
	de HERE het mie omstoan leerd,
	mien leven wol Hai toch nait vroagen,
	joa, dood het Hai nog van mie weerd.

7	Och, dou de poorten veur mie open,
	de poorten van gerechteghaid,
	doar zel ik deur noar binnen lopen,
	om Hom te priezen ien mien laid.
	Dit is de tougang noar de HERE,
	doar t vrome volk noar binnen gaait.
	k Wil om joen antwoord Joe vereren,
	en om joen haail, veur mie beraaid.

8	Dij stain, dij baauwers nait noar t zin was,
	doar metseloar gain goud van zee,
	dij om te bruken heur te min was,
	kwam toch as houkstain op zien stee.
	Dit waark is deur Gods aalvermogen,
	joa, deur zien haand allain gebeurd;
	t is kant een wonder ien ons ogen,
	wèl het zukswat ooit eerder heurd?

9	Een bliede dag wol God ons geven;
	een feestdag gaf ons Isrels Heer.
	Nou mag wie weer ien vrede leven
	kom, zingt mit ons zien noam ter eer.
	O HEER, wil ons joen gunst bewiezen,
	schenk ons joen zegen aaldeur weer.
	Dij ien joen noam komt, zel wie priezen,
	hom priezen oet joen tempel, HEER.

10	De HEER is God, Hai het noa t graauwen
	mit helder licht ons weer verrast;
	moakt ovvers veur ons feest mit taauwen
	bie horens van zien altoar vast.
	Mien God bin Ie, Joe zel ik priezen,
	verhogen, HEER, joen heerlekhaid,
	de HEER is goud, breng eerbewiezen:
	zien goudhaid geldt ien aiweghaid.