| 1 | Aalmachteg is de HEER! |
| | Zing, wereld, tot zien eer, |
| | joa, zing ien ale landen, |
| | wees blied aan wiedse stranden. |
| | Hai troont ien donkerhaid, |
| | mit wolken as zien klaid. |
| | Zien troon het vaaste grond, |
| | rust op zien traauw verbond. |
| | God is gerechteghaid. |
| |
| 2 | Een vuurvlam, fèl en hait, |
| | dij tou zien oog oetgaait, |
| | verschruit aan ale zieden |
| | heur, dij zien macht bestrieden. |
| | Zien weerlicht, wit en hèl, |
| | moakt haile wereld kèl, |
| | t gebaargte is oetstuur |
| | en smelt as was bie vuur. |
| | God is t dij heersen zel. |
| |
| 3 | Oet hemel heur ie t laid |
| | van zien gerechteghaid, |
| | zien glorie staait ien wolken |
| | veur t oog van ale volken. |
| | Wèl t nait van God verwacht, |
| | mor baauwt op vremde kracht, |
| | dij komt beschoamd te stoan. |
| | Elk mout zuk boegen goan: |
| | God het ja ale macht! |
| |
| 4 | Wat wied en zied gebeurt, |
| | dat wordt ien Sion heurd, |
| | en Juda's dochters zingen |
| | van God zien rechtsgedingen. |
| | Van Joe is t Keunenkriek; |
| | gain god is Joe geliek, |
| | en haile wereld rond |
| | zingt elk mit haart en mond: |
| | Van God allain is t Riek! |
| |
| 5 | Hol ie van God de HEER, |
| | dou den gain zunde meer. |
| | Hai let joe nait belanden |
| | ien goddeloze handen. |
| | t Licht wordt veur vromen zaaid, |
| | en bliedschop wordt ter maaid. |
| | Zing, vromen, om joen lot, |
| | wees blied en daank joen God, |
| | Godlof ien aiweghaid! |
| |
