| |
| 1 | O God van vroak, verschien ien glorie, |
| | kom toch ien t èn en roup viktorie, |
| | dij grootske lu, geef heur om liek, |
| | teun heur joen vroak, zet heur aan zied. |
| | Kom, rechter mit joen streng gericht |
| | en teun heur joen vergrèld gezicht. |
| |
| 2 | Hou laank, HEER, goan de goddelozen |
| | op wegen doar zai zulf veur kozen |
| | en bin zai bliede hier op oard' ? |
| | Minhoeden hebben t hoogste woord, |
| | dat snaart en dut, zuks rap en roet, |
| | en slagt nait aans as laster oet. |
| |
| 3 | Kiek, HEER, hou zai joen volk vernailen, |
| | joen aarfdail sikkom ja verdailen, |
| | hou t gaait mit wees en wedevraauw, |
| | mit aander lu, tot dood aan tou. |
| | "God zigt dat nait", zo klinkt heur spot, |
| | "vernemt dat nait, Jokkob zien God". |
| |
| 4 | Begriep den toch, ie domme dwoazen, |
| | onneuzel volk mit aal joen roazen, |
| | het Hai joe nait joen oren doan, |
| | zol God joezulf den nait verstoan? |
| | Dij t oog joe gaf, zol Dij meschain |
| | blind wezen en zulf nait goud zain? |
| 5 | Zol Hai dat volk gain zeggen geven? |
| | Zien kennes let heur overleven! |
| | God dij aan mensk zien wegen leert, |
| | zol dulden dat men Hom nait eert? |
| | Hai wait wat leeft ien t menskenkiend: |
| | t is zuver niks as n poestje wiend. |
| |
| 6 | Geluk zel hai allain vernemen |
| | dij Ie goud onder handen nemen |
| | en dij Ie leren oet joen wet. |
| | Zo wordt ain op Gods wegen zet. |
| | Mor wee veur hom, dij Joe veracht, |
| | dij vaalt ien koel - veur hom wordt t nacht. |
| |
| 7 | De HEER, Hai zel zien volk verkaizen, |
| | dat aarfdail zel Hai nait verlaizen. |
| | Joen rechtsproak gaait weer haand ien haand |
| | mit t recht dat weerkomt ien dit laand, |
| | en elkain dij den woarhaid eert, |
| | holdt zuk aan t recht, dat God hom leert. |
| |
| 8 | Wèl komt veur mie op tegen mensen, |
| | dij bloots t verkeerde van mie wènsen? |
| | Wèl woart mie tegen t minne volk, |
| | wèl is mien börg, wèl is mien tolk? |
| | As mie de HEER nait helpen wil, |
| | ik was omtrent veur aiweg stil. |
| |
| 9 | En zeg ik sums: Mien vout gaait glieden, |
| | da'k vaal wil Ie veurvaast nait lieden, |
| | den holdt joen gunst mie, HEER, ien t èn, |
| | en bin ik over t slimste hèn. |
| | Bie aal mien rusteloos getob, |
| | is doar joen troost, dij beurt mie op. |
| |
| 10 | Zol God mit lu ien ain joar wezen, |
| | dij onrechtveerdeghaid nait vrezen, |
| | mit ain dij ien zien overmacht |
| | onschuldeg bloud de dood ienjagt? |
| | Dat vaalze volk, zo ien-gemain, |
| | het t aaid op vrome lu veurzain. |
| |
| 11 | Mien stainhoes is mien God, de HERE, |
| | aal onrecht wait Hai zo te keren, |
| | dat t hailtied op heur zulf deelkomt, |
| | dat is heur straf, zai stoan verstomd! |
| | Mien God, ròts, doar ik mien touvlucht wait, |
| | vergraimt heur om heur minneghaid. |
