| |
| 1 | Ik zel, zo laank as k leef, bezingen ien mien laid |
| | joen gunstbewiezen, HEER, en joen laankmoudeghaid. |
| | Mien mond verkundegt, HEER, aan jongere geslachten |
| | joen grode traauw veur heur, dij aaltied Joe verwachten. |
| | Ien aiweghaid wil Ie aan joen verbondstraauw baauwen; |
| | wat ie ien hemel doun, doar mag wie op vertraauwen. |
| |
| 2 | Ik bin, zo sprekt de HEER, mien vaast verbond begund |
| | mit Doavid, mit mien knecht, mien oetverkoren vrund. |
| | Dou heb Ik hom beloofd, joa, alderdeegs hom sworen: |
| | "Ik zel joen noageslacht ien aiweghaid bewoaren, |
| | joen noam blift aaltied stoan, doar kin ie vaast op reken, |
| | en ook ien loater tied zel Ik mien woord nait breken". |
| |
| 3 | Doarom prist t hemelkoor joen wondermacht, o HEER, |
| | en zingen van joen traauw aal engeln om Joe heer. |
| | Wèl is aan Joe geliek, wèl is zo hoog te priezen? |
| | Groot en geducht is God; loat elk Hom eer bewiezen. |
| | Wèl is zo maans as Ie, o God van legermachten? |
| | Joen traauw stroalt overaal veur heur dij Joe verwachten. |
| |
| 4 | De roege zee wordt kaalm zo gaauw as God dat wil. |
| | Stoan boaren ook ien t èn, Ie moaken heur weer stil. |
| | Hail Rahab is vergraimd; joen vijand is verdreven. |
| | Van Joe is hemel, HEER, en wereld, ale leven. |
| | Alles van Noord tot Zuud bestaait deur joen vermogen, |
| | en wat veur baargtop ook, hai zel joen noam verhogen. |
| |
| 5 | Wat het joen aarm, o HEER, geweldeg grode macht; |
| | joen haand is hemelhoog, joen rechterhaand vol kracht, |
| | dij hol Ie aaltied kloar om alles te besturen. |
| | Joen troon staait steveg vaast, kin aiweghaid verduren, |
| | doar recht en billekhaid hom vasteghaid verlainen. |
| | Goudhaid en traauw stoan kloar om aaltied Joe te dainen. |
| |
| 6 | Hou zoaleg, HEER, is t volk, dat Joe zien lofzang zingt! |
| | Zai lopen ien joen licht, dat haildaal heur omringt, |
| | en jubeln dag en deur van bliedschop veur joen ogen. |
| | Deur joen gerechteghaid zel Ie joen volk verhogen. |
| | Want deur joen gunst bin wie ien kracht en aanzain stegen. |
| | Van Isrels God heb wie ons schild en keunenk kregen. |
| |
| 7 | Ien vrouger tied heb Ie deur dreumgezichten zegd: |
| | "Ik koos oet t haile volk mie Doavid as mien knecht, |
| | Ik mouk een held van hom, deur hom mien hulp te geven, |
| | mit eulie heb K hom zaalfd en hom zo hoog verheven. |
| | Ik steun hom mit mien haand en geef hom nije krachten |
| | en van mien rechteraarm mag hai zien haail verwachten. |
| |
| 8 | Gain vijand van rondom vaalt hom ooit over t mad. |
| | Aal t ontuug om hom tou zöcht hoasteg t hoazepad. |
| | Zulf zel Ik veur zien oog vernailen wèl hom hoaten, |
| | mien laifdevolle traauw, dij zel hom nooit verloaten. |
| | Zien macht zel deur mien noam bie elk tou aanzain komen; |
| | zien haand heerst over zee en over wotterstromen". |
| |
| 9 | Den zegt hai tegen Mie: "Mien Voader en mien God, |
| | op Joe rust aal mien haail, op Joe mien gunsteg lot". |
| | As eerstgeboren zeun zel hai veurnoamste haiten, |
| | maank ale keunengen mag hai zuk hoogste waiten. |
| | Ik loat t verbond mit hom ien aiweghaid nait voaren, |
| | en veur zien noageslacht zel Ik zien troon bewoaren. |
| |
| 10 | Mor as zien noazoat nait meer handelt noar mien wet, |
| | en ien zien levensloop het pad van God verget, |
| | as zai, wat Ik bestel, verachten en onteren, |
| | den kriegen zai wel straf om heur dat òf te leren, |
| | al sloag Ik heur den ook, toch blief Ik aan heur denken, |
| | om ien mien traauwverbond vergivvenis te schenken. |
| |
| 11 | Aan Doavid heb Ik sworen bie mien haaileghaid: |
| | - Ik bin de Woarhaid zulf, en laigen kin Ik nait - |
| | "Zien noazoat blift bestoan, zien noageslacht zel richten. |
| | Zo woar as zun en moan aan hemel aaltied lichten, |
| | zo vaast staait ook zien troon, om nooit weer te verswienden. |
| | Getuug' aan hemel blift ja ook veur aaltied schienen". |
| |
| 12 | En toch heb Ie verstöt en toch heb Ie versmoad! |
| | Op keunenk, deur Joe zaalfd, mouk Ie Joe iezelk kwoad. |
| | Woarom heb Ie hom zaalfd, woarom hom oetverkoren? |
| | t Verbond mit hom is oet, zien kroon ien t stof verloren, |
| | ien puun ligt haile stad en t muurwaark is verbroken, |
| | elk stool mor wat hai wol en het hom gek aanstoken. |
| |
| 13 | Zien tegenstanders, Heer, dij geef Ie grode kracht. |
| | En elk dij hom bestridt, heb Ie verhoogd ien macht, |
| | zien sweerd lait hom ien steek, hou hai zuk ook verweerde, |
| | zodat hai toch ien t lest zien vijand rug toukeerde. |
| | Zien troon is glad vernaild, zien heerlekhaid verswonden. |
| | Zien jonge kracht is vot, zien goie noam is schonden. |
| |
| 14 | Hou laank duur dat nog, HEER? Blief Ie veurgoud bezied? |
| | Blief Ie vergrèld op ons, bin wie joen laifde kwiet? |
| | Wil nait vergeten, HEER, hou gaauw of ain oet tied is |
| | en dat hier elk en ain zien leven mor zo kwiet is. |
| | Op wereld leeft gain mensk, of dood zel hom wel vienden, |
| | zai zellen man veur man ien t dodenriek verswienden. |
| |
| 15 | Woar holden toch vandoag joen gunstbewiezen tou, |
| | dij Ie aan Doavid vrouger sworen ien joen traauw? |
| | Kiek, Here, toch ais aan, hou of joen knechten lieden. |
| | Hou sliepen zai ons oet, en dat van ale zieden. |
| | Dat dut mien haart zo zeer; dat kin ik nait verdroagen. |
| | Joa, haile wereld, HEER, dut mit om ons te ploagen. |
| |
| 16 | Joen tegenstanders, HEER, dij spotten toerloos deur. |
| | Zai spotten astertou, dat ik het aal mor heur. |
| | Zai hebben gek mit ons, omdat deur vijands handen |
| | ons keunenk votsleept is, haildaal noar vremde landen. |
| | Toch priezen wie joen noam, hou of Ie ons benaauwen, |
| | mit "amen, amen", HEER, omdat wie Joe vertraauwen. |
| |
