| |
| 1 | Joa, God is goud veur Israël, |
| | t is eerlieks woar. Zai maarken t wel, |
| | dij zuver en rechtveerdeg leven, |
| | mor ik was sikkom stoeken bleven. |
| | Mien ofgunst gruide bie de dag, |
| | dou k aal dij lust en riekdom zag |
| | van goddelozen ien heur woan, |
| | dij weeldereg deur t leven goan. |
| |
| 2 | Begriepen kon ik mie dat nait, |
| | t was veur t gemoud een aarm verdrait, |
| | k laip dag en deur mie òf te vroagen: |
| | "Woarom mout ik dat aal verdroagen?" |
| | Dou bin ik tempel binnengoan, |
| | en heb joen haaileg woord verstoan. |
| | Dou zag k heur goan ien grode nood, |
| | het zundoarspad laaidt wis noar dood. |
| |
| 3 | k Zel bie Joe wezen dag en nacht, |
| | van Joe is t dat ik hulp verwacht, |
| | k goa vaaileg aan joen haand deur t leven, |
| | joen traauwe zörg wil Ie mie geven. |
| | Joen vaaste wil gaait aaltied deur, |
| | aal wat beloofd is, stoa Ie veur. |
| | Ie zellen mie ien wies belaaid |
| | opnemen ien joen heerlekhaid. |
| |
| 4 | As ik Joe doar nait aantref, Heer, |
| | is hemel mie gain hemel meer, |
| | en wat ik hier ook vien op eerde, |
| | t het zunder Joe totoal gain weerde. |
| | As t liggoam mie beswieken gaait, |
| | mien God, mien Ròts, ontvaalt mie nait. |
| | Hai is mien aarfdail, dij mie wacht, |
| | zo leef ik aiweg deur zien kracht. |
| |
| 5 | Wèl wied van Joe zien leven laaidt, |
| | en zo zien aigen wegen gaait, |
| | zien pad lopt dood; niks kin hom boaten. |
| | Wèl Joe verlet, dij wordt verloaten. |
| | Mor t is mien lust, mien grootst genot |
| | om tou te holden bie mien God. |
| | Mien touvlucht is bie Hom allain, |
| | k vertel zien doaden elk en ain. |
| |
