| |
| 1 | Joa wis, mien ziel is stil veur God. |
| | Zien haail geft Hai mie ieder bòt. |
| | Hai is mien börg, op Hom kin k baauwen. |
| | Hai geft mie aaltied vasteghaid. |
| | As alles om mie tou vergaait, |
| | kin ik steevaast op Hom vertraauwen. |
| |
| 2 | Hou laank, o vijand, draaig ie mie, |
| | en moak ie aaldeur jacht op mie? |
| | Joen taargen is nait te verduren! |
| | Zulf vaal ie dommit as een wand, |
| | dij schaif en schèl brekt oet t verband, |
| | ie störten deel as vrakke muren. |
| |
| 3 | Mien vijanden, ien t kwoade ain, |
| | zai hebben t lèlk op mie veurzain, |
| | mien ondergang is t wat zai zuiken. |
| | Zai proaten vroom, mor binnenien |
| | is t niks as vaalshaid en venien, |
| | ien stilte goan zai mie verfluiken. |
| |
| 4 | Joa wis, mien ziel, keer die tot God. |
| | Van Hom verwacht ik t ieder bòt. |
| | Joa woar, Hai geft mie steun ien t leven. |
| | Hai holdt mie vaast, ik wankel nait. |
| | Wees stil bie God, dij noast die staait. |
| | Zien kracht, zien haail zel Hai die geven. |
| |
| 5 | Op God rust aal mien haail, mien eer, |
| | mien staarke stainròts is de HEER, |
| | mien schoelploats, Hai zel mie bewoaren. |
| | Vertel aan Hom wat joe benaauwt. |
| | Nooit wordt vergees op Hom vertraauwd. |
| | Dij bie Hom schoelt, dij zel Hai spoaren. |
| |
| 6 | Joa wis, ainvoudeg volk is lucht, |
| | mor hai dij groot is en geducht |
| | is ook een leugen ien Gods ogen. |
| | Gainain hier legt gewicht ien schoal, |
| | hier helpt gain macht en gain kaptoal, |
| | zai valen dij zukzulf verhogen. |
| |
| 7 | Zuik toch bie roverij gain boat, |
| | moak op geweld en macht gain stoat, |
| | op riekdom mout ie nait vertraauwen. |
| | Geef aan begereghaid gain vout, |
| | God rekent nait mit geld of goud, |
| | op werelds goud kin ie nait baauwen. |
| |
| 8 | God zee - t is zekerwoar gebeurd -, |
| | tot twijmoal tou heb ik dat heurd, |
| | dat Hai ien wereld ale macht het. |
| | Mor zien genoad' is net zo groot, |
| | dat geldt bie leven en bie dood, |
| | veur elk, dij t aal van Hom verwacht het. |
| |
