| |
| 1 | Wees mie genoadeg, God, zai trappen mie |
| | dag ien, dag oet, en onderdrukken mie. |
| | Joa, ale mensken moaken dat ik lie |
| | deur heur filaaine ploagen. |
| | k Vertraauw op Joe, ook ien benaauwde doagen, |
| | op Joe, mien God, joen woord mag mie behoagen. |
| | k Vertraauw op God; mit Hom duur ik t wel woagen. |
| | Gain mensk dut kwoad aan mie. |
| |
| 2 | Dag ien, dag oet, verdraaien zai mien woord, |
| | zai konkeln mor en steukeln niks as kwoad. |
| | Zai gloepen en begluren mie op stroat |
| | en loeren op mien leven. |
| | Wil aan dat minne volk gain kaans meer geven; |
| | loat veur joen vroak heur siddern, HEER, en beven. |
| | Mit Joe woag ik t ja veur mien haile leven. |
| | Gain mensk dut mie den kwoad. |
| |
| 3 | Ik swien hier om en kroep mor aal bezied. |
| | Dou ien joen kroek de troanen van mien stried. |
| | t Staait toch bie Joe te bouk veur loater tied |
| | om ainmoal te verreken? |
| | Roup ik om hulp, vot is mien vijand weken. |
| | Dat God mie helpt, dat is den dudelk bleken. |
| | Ik pries Gods woord; ik mag ja op Hom reken. |
| | Gain mensk zet mie op zied. |
| |
| 4 | Ien tied van nood heb ik geloftes doan: |
| | dij zel ik nou aan Joe betoalen goan. |
| | Ie mouken ja veur mie weer roeme boan, |
| | zo kon ik wieder lopen. |
| | k Huif mien geloof nou nait mit dood bekopen, |
| | mor weg noar t leven ligt weer veur mie open. |
| | Ik loop mien pad mit Hom en ik mag hopen, |
| | op licht ien mien bestoan. |
| |
