| 1 | HEER, mien haart staait veur Joe open, |
| | ik vertraauw op Joe, mien God. |
| | Loat mie toch veur niks nait hopen, |
| | dat gain vijand mie bespot. |
| | Nooit moak Ie te schaande, HEER, |
| | dij geleuveg op Joe reken, |
| | mor beschoamd stoan keer op keer |
| | dij mor zo heur woord verbreken. |
| |
| 2 | HEER, wil mie joen wegen leren, |
| | wies mie t pad, doar k lopen mout. |
| | Ien joen woarhaid wil k verkeren, |
| | want bie Joe, mien God, is t goud. |
| | Joa, ik vien bie Joe allain |
| | aal mien haail. Ik zit te wachten, |
| | aaldeur noar Joe oet te zain, |
| | nooit goan Ie oet mien gedachten. |
| |
| 3 | HEER, wil ien joen goudhaid denken |
| | aan joen traauw, doar ik op plaait. |
| | Wil mie joen genoade schenken, |
| | dij ja geldt ien aiweghaid. |
| | Denk nait aan mien jongestied; |
| | wat ik oethil ien dij joaren, |
| | schel mie dat genoadeg kwiet, |
| | wil mie ien joen goudhaid spoaren. |
| |
| 4 | Goud en woar is God, de HERE, |
| | en zien woord wil Hai veur stoan. |
| | Doarom zel Hai zundoars leren |
| | om op t goie pad te goan. |
| | Elk dij min denkt van zukzulf |
| | wil Hai dudelk t recht verkloaren. |
| | Joa, dij min denkt van zukzulf |
| | zel Hai op zien weg bewoaren. |
| |
| 5 | Ien zien wegen teunt de HERE |
| | dat Hai traauw is aan zien woord. |
| | t Geldt veur heur dij Hom vereren, |
| | en wèl zien verbond bewoart. |
| | Wil omwille van joen noam |
| | aal mien zunde mie vergeven, |
| | ik heb euvels wat misdoan, |
| | kwoad op kwoad heb ik bedreven. |
| |
| 6 | Wèl zien wil is t God te vrezen |
| | as het alderhoogste goud? |
| | God zel hom tou laaidsman wezen, |
| | wiezen woar hai lopen mout. |
| | Elk dij leeft oet s HEREN haand |
| | dij wordt zegend ien zien leven, |
| | en God zel t beloofde laand |
| | ainmoal aan zien noazoat geven. |
| |
| 7 | Dij de HEER van haarten vrezen |
| | goan as vrunden aan zien zied. |
| | En veur heur zel t dudelk wezen: |
| | Gods verbondstraauw geldt aaltied. |
| | Hailtied kiek ik oet noar God; |
| | komt mien vout ooit vaast te roaken, |
| | den brekt Hai de struup kepot |
| | om mie zo weer vrij te moaken. |
| |
| 8 | Ien ellèn sliet ik mien uren, |
| | en mien ainzoamhaid is groot. |
| | Doezend angsten mout k verduren; |
| | red mie toch oet zörg en nood. |
| | Zai mien muite en ellèn, |
| | wil mie aal mien schuld vergeven. |
| | Haile wereld staait ien t èn, |
| | en zai loeren op mien leven. |
| |
| 9 | Help mie toch en red mien leven, |
| | aans beswiek ik ien dij stried, |
| | wil, o God, mie oetkomst geven, |
| | ik kroep ja bie Joe bezied. |
| | k Wacht op Joe, och loat toch HEER, |
| | echte vroomhaid mie bewoaren. |
| | Red joen volk en help het weer |
| | oet benaauwdhaid en gevoaren. |
| |
