| |
| 1 | Pries Hom mit t bliede zingen |
| | van t allerhoogste laid. |
| | Goa Hom joen hulde brengen, |
| | dij boven alles staait. |
| | De Heer, Hom wil ik priezen |
| | mit t laid oet t laand doar k bin |
| | en ale eer bewiezen |
| | zo laank ik oamen kin. |
| |
| 2 | Wat goud is t om te baauwen |
| | op God van Israël, |
| | dat ie joe touvertraauwen |
| | aan Hom dij redden zel. |
| | Hai is joen haail en zegen, |
| | joen riekdom zunder èn, |
| | Hai laaidt joe op zien wegen, |
| | nooit wor ie muid of min. |
| |
| 3 | Hai is van ale staarken |
| | de staarkste dij der is. |
| | Dat vaalt rondom te leren |
| | van aal wat schoapen is, |
| | van oarde en van hemel, |
| | van wat doar leeft en dut, |
| | van zee mit zien gewemel, |
| | van wat ter vlugt ien lucht. |
| |
| 4 | Op Hom kin ie vertraauwen, |
| | dat joe gain onrecht treft, |
| | aan heur dij op Hom baauwen |
| | is t dat Hai t goie geft. |
| | Oet laifde zel gebeuren |
| | zien woord, aal wat Hai zegt, |
| | komt t vaals geweld noar veuren, |
| | Hai woart joe ien t gerecht. |
| |
| 5 | Hai wait wel doezend wegen |
| | oet t riek van dood vandoan! |
| | Hai geft joe brood, zien zegen, |
| | ien nood van joen bestoan, |
| | leert joe ien t duustern zingen, |
| | zulfs ien gevangenschop, |
| | Hai zel joe vrijhaid brengen, |
| | oet ploag richt Hai joe op. |
| |
| 6 | Hai geft aan blinde ogen |
| | nij zicht op lichtschoon dag, |
| | wèl aans nait kin, wordt droagen, |
| | wël swak is geft Hai kracht. |
| | Hai holdt van wël Hom mainen, |
| | wël op zien wegen goan, |
| | as vrund wil Hai heur dainen |
| | en toerloos noast heur stoan. |
| |
| 7 | Hai wil beschaarmer wezen |
| | van vremden om ons tou, |
| | aan wedevraauw en wezen |
| | blift Hai veur aaltied traauw. |
| | Mor lu dij Hom nait mainen, |
| | op heur is Hai vergrèld, |
| | heur hoes zel Hai vergraimen, |
| | heur stee wordt nait meer teld. |
| |
| 8 | Hou kin ik Hom ooit priezen, |
| | ik bin ja veuls te min, |
| | hou keunink eer bewiezen, |
| | ik, aindagsblom dij k bin. |
| | Hai wil mie thoeskomst geven |
| | bie t volk op God zien dag, |
| | ik wil der geern veur leven |
| | dat k veur Hom zingen mag. |
| |
| | Du meine Seele, singe |
| | Paul Gerhardt (1607-1676) |
| |
